កំពង់ឆ្នាំង៖ បុរសម្នាក់ បានរងរបួសធ្ងន់ និងបាក់ជើងខាងឆ្វេងម្ខាង និងស្ត្រីម្នាក់ទៀត រងរបួសស្រាល នៅក្នុងហេតុការណ៍ គ្រោះថ្នាក់ចរាចរណ៍មួយ បង្កឡើងដោយរថយន្ត ទៅបុកម៉ូតូជនរងគ្រោះ ពីក្រោយពេញមួយទំហឹង ។ កាលពីម៉ោង ៧និង ៣០នាទី យប់ថ្ងៃទី១២ ខែមករា ឆ្នាំ២០១៥ នៅផ្លូវជាតិលេខ៥ ក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ។
រថយន្តបង្កម៉ាកតូយ៉ូតា កាមរីស៊េរីឆ្នាំ១៩៩៥ ពណ៌ប្រផេះ ពាក់ស្លាកលេខភ្នំពេញ ២B-៧៧៩៨ បើកបរដោយ បុរសម្នាក់ឈ្មោះ ឃុន ឃីម អាយុ៣៣ឆ្នាំ មានទីលំនៅ ភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង។ រថយន្តនេះ បានបើកទៅបុកម៉ូតូ របស់ជនរងគ្រោះ ម៉ាកហុងដាវ៉េវ ពណ៌ក្រហម ពាក់ស្លាកលេខកំពង់ឆ្នាំង ១C-២៣៨៦ ពីក្រោយពេញមួយទំហឹង ក្នុងពេលកំពុងបើកបរ ស្របទិសគ្នា តាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង ។
បុរសម្នាក់ឈ្មោះ ស៊ុយ ឈីម អាយុ៦៤ឆ្នាំ មានទីលំនៅភូមិសន្ទូច ឃុំស្រែថ្មី ស្រុករលាប្អៀរ ជាអ្នកបើកម៉ូតូ រងរបួសធ្ងន់ បាក់ជើងខាងឆ្វេងម្ខាង និងស្ត្រីម្នាក់ទៀត ឈ្មោះ យូ ធីវី អាយុ២៨ឆ្នាំ មានទីលំនៅ ក្នុងភូមិទី៣ សង្កាត់ខ្សាម ក្រុងកំពង់ឆ្នាំង ជាអ្នកជិះពីក្រោយ រងរបួសស្រាល ។
ក្រោយពេលកើតហេតុ ជនរងគ្រោះ ត្រូវបានគេដឹកទៅកាន់មន្ទីរពេទ្យ។ រីឯមធ្យោបាយបង្ករ ត្រូវបានប៉ូលិសយកទៅរក្សាទុក នៅអធិការដ្ឋាននគរបាល ក្រុងកំពង់ឆ្នាំង ដើម្បីរង់ចាំធ្វើការដោះស្រាយ ៕
