ថ្ងៃ | ការិ.ពាណិជ្ជកម្ម : 097 780 51 35 / 069 351 368 ការិ.និពន្ធ : 012 304 401 E-mail: areyathor@yahoo.com
Breaking News :
 មន្ត្រីបរិស្ថាន ក្នុងខេត្តកំពង់ឆ្នាំង បណ្តោយឲ្យពួកក្រុមជនល្មើស ធ្វើសកម្មភាព ចូលកាប់ឆ្ការ ឈូសឆាយ ទន្រ្ទានយកដីគម្រប ព្រៃឈើ ដែលគ្រប់គ្រងដោយមន្ទីរបរិស្ថាន ខេត្តកំពង់ឆ្នាំងវាស់ចែកគ្នា លក់យ៉ាងគគ្រឹកគគ្រេង​  ||     ឈ្មោះ ឯក សារិន ហៅវុធ មេប៉ុស្ទិឃុំទន្លេបិទ មានអំណាចកាងបនល្បែងជល់មាន់នៅព្រៃខ្មោច សូមអគ្គស្នងការមេត្តាពិនិត្យបុគ្គលខិលខូចរូបនោះផង​  ||     ដីគម្របព្រៃឈើនៅតាមជួរភ្នំក្នុងឃុំ ត្រងិល ដែលគ្រប់គ្រងដោយសហគមន៍ព្រៃឈើ កំពុងទទួលរងនូវការ បាត់បង់អស់ទាំងស្រុងនៅលើទឹកដី ស្រុកកំពង់លែង​  ||     លោក​ គង់ ណារិន្ទ មេប៉ុស្តិ៍ច្រកបុសមន ហ៊ានធ្វើអ្វីៗតាមអំពើចិត្ត គឺដោយសារមានលោក កឹង ឃន ស្នងការនគរបាលខេត្តស្វាយរៀង ជាបង្អែកដ៏រឹងមាំ?​  ||     ភ្ញាក់ផ្អើល! ឈ្មួញធ្វើអាជីវកម្មជីករណ្តៅដីក្នុងឃុំអូរតាគី ស្រុកថ្មគោល មានការឃុបឃិតជាប្រព័ន្ធ​  ||   

» ព័ត៌មានជាតិ » អា​ជី​រករ​ផ្សារ​នាគ​មាស​តវ៉ា​ប្រឆាំងនឹង​ការដំឡើង​ថ្លៃឈ្នួល​តូប​ ​

អា​ជី​រករ​ផ្សារ​នាគ​មាស​តវ៉ា​ប្រឆាំងនឹង​ការដំឡើង​ថ្លៃឈ្នួល​តូប​ ​

ភ្នំពេញ​៖ អាជីវករ​ផ្សារ​នាគ​មាស ដែល​នៅក្បែរ​ផ្សារ​ដើម​គ នាំគ្នា​ធ្វើបាតុកម្ម​នៅ​ថ្ងៃ​អង្គារ​នេះ ប្រឆាំងនឹង​ប្រធាន​ផ្សារ ដែល​ពួកគេ​ចោទថា បាន​ដំឡើង​តម្លៃ​ជួល​តូប​ខ្ពស់​ពេក និង​មាន​លក្ខខណ្ឌ​មួយចំនួនទៀត ដែល​អាជីវករ​មិនមាន​លទ្ធភាព​បង់ថ្លៃ ។​
​តាម​គម្រោង​ក្រុមអាជីវករ គ្រោង​ហែ​ញត្តិ​ទៅ​ដាក់​នៅ​រដ្ឋសភា ដើម្បី​ស្វែង​អន្តរាគមន៍​តែ​ដោយមាន​ការសម្រួល​ពី​អាជ្ញាធរ​ខណ្ឌទួលគោក ពួកគេ​ប្រមាណ​៥០​នាក់ បានធ្វើ​បាតុកម្ម​នៅមុខ​ផ្សារ ដោយ​លើក​បដា​ទាមទារ​កុំ​ដំឡើងថ្លៃ​ឈ្នួល​តូប និង​ទាមទារ​ឲ្យ​រៀបចំ​សណ្តាប់ធ្នាប់​ក្នុង​ផ្សារ ដើម្បី​ទាក់ទាញ​អតិថិជន​ចូល​ទិញ​ទំនិញ​ក្នុង​ផ្សារ​នេះ ។
​អ្នកស្រី សំ សារិទ្ធ ដែល​អះអាង​ជា​តំណាង​អាជីវករ ថ្លែងថា​ចាប់ពី​ថ្ងៃទី​១ ខែវិច្ឆិកា ប្រធាន​ផ្សារ​បាន​ដំឡើងថ្លៃ​ជួល​តូប​ប្រមាណ​២០​ភាគរយ​បន្ថែម​លើ​ថ្លៃដើម ។ ចំណែក​ថ្លៃ​ភ្លើង ទឹក ក៏​ខ្ពស់ជាង​តម្លៃ​រដ្ឋ​ទ្វេដង ។ អ្នកស្រី​បន្តថា អាជីវករ​គ្មាន​លទ្ធភាព​បង់ថ្លៃ​ជួប​តូប​នេះ​បានទេ ខណៈ​មិនសូវមាន​អតិថិជន​ចូល​ផ្សារ​នេះ ។ អ្នកស្រី​ថា «​ក៏ប៉ុន្តែ ពួកយើងខ្ញុំ​ទាំងអស់គ្នា ជា​អាជីវករ​ទាំងអស់​ហ្នឹង គឺ​សំណូមពរ​សុំ​កុំ​ឲ្យ​គាត់​ឡើងថ្លៃ​ពេក គឺ​ឡើង​ត្រឹមតែ​៥​ភាគរយ​បាន​ហើយ កាលណា​ដំឡើងថ្លៃ​ពេក គឺ​ពួកនាង​ខ្ញុំ​អត់​មានលទ្ធភាព នឹង​ការបង់​ទេ ព្រោះ​អីយើ​ង​លក់​បន្លែ​មួយ​កញ្ច្រែង​ពីរ​កញ្ច្រែង គ្រាន់តែ​ចិញ្ចឹម​កូន និង​ញ៉ាំ​បាយ​មួយពេលៗ​ឲ្យ​គ្រប់​ហ្នឹង មិន​គ្រប់​ទៀត​។ ហើយ​សូម​សំណូមពរ​នៅ​ទីផ្សារ​នេះ សូម​ឲ្យ​គាត់​បើក​ជា​អាជីវកម្ម​ដូចជា ផ្ញើ​កង់ ម៉ូតូ ឬ​ឡាន សូម​ឲ្យ​មាន​អាជីវកម្ម​អ្នក​ក្រៅ​មក​ចូលធ្វើ​។ បើសិន​គាត់​ធ្វើ​តែ​គ្នា​គាត់ អ៊ីចឹង​ផ្សារ​ហ្នឹង​អត់​រីកចម្រើន​» ។​
​អ្នកស្រី សំ សារិទ្ធ សំណូមពរ​ឲ្យ​ប្រធាន​ផ្សារ​រៀបចំ​សណ្តាប់ធ្នាប់​ក្នុង​ផ្សារ​ឲ្យ​មាន​អនាម័យ និង​ស្នើ​ឲ្យ​បញ្ចុះតម្លៃ​ផ្ញើ​ម៉ូតូ និង​រថយន្ត​ជាដើម ។​
​អភិបាលរង​ខណ្ឌទួលគោក លោក ប៉ាង លីដា ដែល​ចូលរួម​ដោះស្រាយ​បញ្ហា​នេះ​ថ្លែងថា លោក​ស្នើ​ឲ្យ​អាជីវករ​សរសេរ​ពាក្យ​បណ្តឹង​ជា​លាយ​លក្ខ​អក្សរ ដាក់ជូន​អភិបាលខណ្ឌ​ទួលគោក ។ លោក​បន្តថា បន្ទាប់មក​លោក​នឹង​កោះអញ្ជើញ​ប្រធាន​ផ្សារ និង​តំណាង​អាជីវករ​៥​នាក់ ចូលទៅ​ដោះស្រាយ ។ លោក​បញ្ជាក់ថា «​ទី​១ ខ្ញុំ​សូម​ឲ្យ​បងប្អូន​អាជីវករ​ទាំងអស់ ធ្វើ​ពាក្យបណ្តឹង ធ្វើការ​ក្រដាស​ស្នាម ជំហាន​ទី​១ ឲ្យ​ខ្ញុំ​មាន​ក្រដាស​ស្នាម​ដើម្បី​ឲ្យ​ខ្ញុំ​ងាយស្រួល​ហៅ​តំណាង​អាជីវករ ខាង​ផ្សារ និង​សង្កា​ត់ទៅ​ចូលរួម​ក្នុង​ខណ្ឌទួលគោក​» ។​
​លោក វេ​ង តាក់ តំណាង​ផ្សារ​នាគ​មាស​ទទួលបន្ទុក​ផ្នែក​បេឡា​មានប្រសាសន៍ថា ការដំឡើង​ថ្លៃឈ្នួល​តូប​នេះ ធ្វើឡើង​តាម​កិច្ចសន្យា​កាលពី​ឆ្នាំ​២០០៤ ។ លោក​បន្តថា ផ្សារ​នេះ​មិនបាន​លក់​តូប​ឲ្យ​អាជីវករ​ទេ ប៉ុន្តែ​ជួល​តូប​ឲ្យ​អាជីវករ​មានតម្លៃ​ទាប​បំផុត ៣០​ដុល្លារ​ឡើងទៅ​តាម​តូប​តូច ឬ​ធំ ។ ទោះជា​យ៉ាងណា លោក​ទទួលស្គាល់ថា​តម្លៃ​ទឹក ភ្លើង ពិតជា​ថ្លៃ ដោយ​លោក​យកលុយ​ទាំងនោះ​ទៅ​ប៉ះប៉ូវ នៅពេល​បើកភ្លើង​នៅពេល​យប់ ការពារ​ទ្រព្យសម្បត្តិ​អាជីវករ ។ លោក​បន្ថែមថា «​ដល់ពេល​គាត់​លក់​អត់ សូវ​ដាច់ [​គាត់​]​មក​សំណូមពរ​ថៅកែ​ខ្ញុំ សម្រួល​ចុះ​តម្លៃ​ជូន គាត់​សន្យា​ចុះ​ហើយ ថ្ងៃក្រោយ​ត្រូវ​ដំឡើង​បន្តិចៗ​វិញ​ឲ្យ​ស្មើនឹង​កិច្ចសន្យា​ដើម​វិញ រឿង​ហ្នឹង​វា​អ៊ីចឹង មិនមែន​តែ​ប៉ុន្មាន​ថ្ងៃ​ហ្នឹង​ទើបតែ​ឡើង​ទេ ពី​ដើម​មក​អ៊ីចឹង តែមួយ​ឆ្នាំ កិច្ចសន្យា​មួយឆ្នាំ​ម្តង មួយឆ្នាំ​និយាយ​មួយ​សារ​តម្លៃ​» ។​
​ទោះជា​យ៉ាងណា អាជីវករ​ស្នើ​ឲ្យ​ប្រធាន​ផ្សារ​នាគ​មាស ដំឡើងថ្លៃ​ឈ្នួល​ត្រឹមតែ​៥​ភាគរយ ពោល​មិនមែន​ដំឡើង​រហូតដល់​២០​ភាគរយ​នោះទេ ។ ពួកគេ​ព្រមាន​ថា បើ​ពុំ​នោះទេ អាជីវករ​នឹង​ហែ​ញត្តិ​ទៅ​ដាក់ជូន​រដ្ឋសភា​ថ្ងៃស្អែក​ទៀត ៕1

Copyright © 2010-2021 · អរិយធម៌ · All Rights Reserved.
Develop by Sek Sathya