ថ្ងៃ | ការិ.ពាណិជ្ជកម្ម : 097 780 51 35 / 069 351 368 ការិ.និពន្ធ : 012 304 401 E-mail: areyathor@yahoo.com
Breaking News :
 អំពើពុករលួយរបស់លោក ឈុន សុភមង្គល ប្រធានសាខាគយខេត្តឧត្តរមានជ័យ ត្រូវបានបណ្តាញព័ត៌មាននានា ចុះផ្សាយជាបន្តបន្ទាប់​  ||     ល្បី លោក ឈុន សុភមង្គល​ ប្រធានសាខាគយខេត្តឧត្តរមានជ័យ​ ?​  ||     ភ្ញាក់ផ្អើល! ក្រុមឈ្មួញសម្រុករកស៊ីដឹកឈើគ្រប់ប្រភេទក្នុង ទឹកដី ស្រុកកែវសីមា, ខេត្តមណ្ឌលគិរី, និងស្រុកស្នួល ខេត្តក្រចេះ ទៅប្រទេសវៀតណាមខ្លះ និងប្រភេទឈើក្រហមដឹក ទៅដាក់ខេត្តព្រៃវែងនិងស្វាយរៀង​  ||     ភ្ញាក់ផ្អើល! ចាក់ដីរំលោភចូលឆ្នេរសមុទ្រជាង១០០ម៉ែត្រ ដោយគ្មានច្បាប់ សង្ស័យមានការឃុបឃិតជាប្រព័ន្ធ?​  ||     ល្បី! ម្ចាស់​សង្វៀន​ឈ្មោះ​តា​ជ័រ បើក​ល្បែង​ប្រជល់មាន់​ដុះ​ស្លែរ ឃុំ​កំពង់​ទ្រាស  ស្រុក​ក្រូចឆ្មារ​  ||   

» ព័ត៌មានជាតិ » អ្នក​តវ៉ា​បឹងកក់​៧​នាក់ ឃុំខ្លួន​នៅ​ពន្ធនាគារ​ព្រៃ​.​ស​ ​

អ្នក​តវ៉ា​បឹងកក់​៧​នាក់ ឃុំខ្លួន​នៅ​ពន្ធនាគារ​ព្រៃ​.​ស​ ​

ភ្នំពេញ ៖ ក្រុមអ្នកតវ៉ា​មកពី​សហគមន៍​បឹងកក់​ចំនួន​៧​នាក់ ក្នុងនោះ​មាន​អ្នកស្រី ទេព វ​ន្នី ម្នាក់​ផង ដែល​ត្រូវបាន​នគរបាល​ចរាច​រណ៍​ផ្លូវគោក រាជធានី​ភ្នំពេញ ឃាត់ខ្លួន​កាលពី​ថ្ងៃទី​១០ វិច្ឆិកា បន្ទាប់ពី​ធ្វើការ​តវ៉ា​បិទផ្លូវ​មុខ​សាលា​រាជធានី ត្រូវបាន​បញ្ជូនមក​សាលាដំបូង​រាជធានី​ភ្នំពេញ នៅ​ព្រឹក​ថ្ងៃទី​១១ វិច្ឆិកា ដើម្បី​ធ្វើការ​សាកសួរ​ពាក់ព័ន្ធ​នឹង​ការនាំគ្នា​បិទផ្លូវ​ធ្វើឱ្យ ស្ទះចរាចរណ៍ ។ សកម្មជន និង​អ្នកភូមិ​បឹងកក់​ទាំងនេះ​សុទ្ធតែជា​ស្ត្រី ដែល​រួមមាន ៖ ១-​ឈ្មោះ ទេព វ​ន្នី ២-​ឈ្មោះ គង់ ចន្ថា ៣-​ឈ្មោះ ផាន់ ឈុន​រ៉េត ៤-​ឈ្មោះ បូ ឆវី ៥-​ឈ្មោះ ង៉ែត ឈុន ហៅ​យាយ​មុំ​ា​មី ៦-​ឈ្មោះ សុង ស្រី​លាភ និង​៧-​ឈ្មោះ នង ស្រេង ។​
​សំណុំរឿង​ស្ត្រី​បឹងកក់​៧​នាក់​នេះ​ស្ថិតនៅ​ដៃ​លោក សៀង សុខ ព្រះរាជអាជ្ញារង​អម​សាលាដំបូង​ធ្វើការ​សាកសួរ ។ បន្ទាប់ពី​សាកសួរ តំណាង​អយ្យការ​បានធ្វើការ​ចោទប្រកាន់​ពីបទ​រារាំង​បង្ក​ឧបសគ្គ​ដល់ ចរាចរណ៍​សាធារណៈ តាម​បញ្ញត្តិ​មាត្រា​៧៨ នៃ​ច្បាប់​ស្តីពី​ចរាចរណ៍​ផ្លូវគោក បទល្មើស​នេះ​ជន​ណា​ដែល​បាន​ប្រព្រឹត្ត​នឹង​តម្រូវ​ផ្តន្ទាទោស​ពី​១​ខែ​ទៅ​១ ឆ្នាំ ។ បន្ទាប់ពី​តំណាង​អយ្យការ​ធ្វើការ​ចោទប្រកាន់​ជា​ផ្លូវការ​ហើយ នៅ​ម៉ោង​២​រសៀល​ថ្ងៃ​ដដែល សំណុំ​រឿងនេះ​ក៏ត្រូវ​បាន​ចាត់​ទៅខាង​ចៅក្រម​សើ​ុ​ប​សួរ និង​បន្ត​បើកសវនាការ​ផ្ទាល់​តែម្តង មិន​ពន្យារពេល​ទេ ។ គួរ​កត់សម្គាល់ថា ខណៈពេល​សមត្ថកិច្ច​នាំ​ខ្លួន​ស្ត្រី​ត្រូវ​ចោទ​ទាំង​៧​នាក់​ទៅដល់ សាលាដំបូង​រាជធានី​ភ្នំពេញ គេ​បានឃើញ​អ្នកគាំទ្រ​មកពី​សហគម​ន៍​បឹងកក់ ថ្មគោល និង​បុរី​កីឡា ប្រមាណ​ជិត​១០០​នាក់ មាន​ព្រះសង្ឃ​៤​អង្គ និង​មាន​បដា​៣-៤​ផ្ទាំង​ទៅ​ឈរ​នៅមុខ​សាលាដំបូង ដោយមាន​ឧ​គ្ឃោ​សន​ស័ព្ទ​ស្រែក​បំពង​សំឡេង​ទាមទារ​សុំឱ្យ​តុលាការ​ដោះលែង អ្នក​ទាំង​៧​នាក់​នោះ​វិញ ។​ក្រុម​អ្នកគាំទ្រ​ប្រមាណ​១០០​នាក់ ពេល​កំពុង​បំពង​សំឡេង​នៅមុខ​សាលាដំបូង​រាជធានី​ភ្នំពេញ កងកម្លាំង​នគរបាល​ព្រហ្មទណ្ឌ​កម្រិត​ស្រាល​រាជធានី​ភ្នំពេញ​ជាច្រើន​នាក់​ក៏ បាន​ទៅដល់​ដែរ ដោយមាន​រថយន្ត​ឃ្លុប​១​គ្រឿង ដែលជា​រថយន្ត​សម្រាប់​ចាប់​មនុស្ស​ឃុំ​។ ស្របគ្នា​នោះ​ក៏​បានឃើញ​កម្លាំង​នគរបាល និង​សន្តិសុខ​សាលាខណ្ឌ​៧​មករា រាប់សិប​នាក់​ប្រើ​ដំបង និង​ខែល​ទៅ​រក្សា​ការពារ សណ្តាប់ធ្នាប់​សាធារណៈ​នៅ​ទីនោះ ។ មិនយូរប៉ុន្មាន​មាន​រថយន្ត​របស់​សាលាខណ្ឌ​មួយគ្រឿង​បំពាក់​មេក្រូ បាន​ទៅ​ប្រកាសជូន​ដំណឹង​ដល់​ក្រុម​អ្នកគាំទ្រ​ឱ្យ​រក្សា​ភាព​ស្ងៀមស្ងាត់ ដើម្បី​ទុកពេល​ឱ្យ​តុលាការ​ធ្វើការ និង​ចៀសវាង​ប៉ះពាល់​ដល់​របៀបរៀបរយ​សាធារណៈ ហើយ​បើ​ចង់​តវ៉ា​ណាមួយ​ឱ្យធ្វើ​ទៅតាម​ច្បាប់ ។ មានការ​ព្រមាន​ថា ក្រោយពី​ប្រកាស​ជូនដំណឹង​នេះ​រយៈពេល​២០​នាទី បើ​នៅតែ​រឹងទទឹង​មិន​ព្រមស្តាប់ សមត្ថកិច្ច​នឹង​ចាត់វិធានការ ។​
​ដោយសារតែ​ការស្រែក​តាម​មេក្រូ​នៅតែ​បន្លឺឡើង​នោះ ក្រុម​សន្តិសុខ​សាលាខណ្ឌ​៧​មករា ដោយមាន​ការគាំទ្រ​ពីក្រោយ​ដោយ​កង​នគរបាល​ផង បាន​សម្រុក​ចូលទៅ​ចាប់​ស្ត្រី​មេក្រុម​ដឹកនាំ​ការគាំទ្រ អូស​បង្ខំ​ឱ្យចូល​រថយន្ត​ឃ្លុប​ចំនួន​៣​នាក់ និង​ព្រះសង្ឃ​១​អង្គ ក៏ត្រូវ​រុញ​បញ្ចូល​ក្នុង​រថយន្ត​ឃ្លុប​នោះដែរ ។ ស្ត្រី​៣​នាក់ និង​ព្រះសង្ឃ​១​អង្គ ក្រោយពី​ចាប់​បញ្ចូល​ទៅក្នុង​រថយន្ត​ឃ្លុប​ហើយ ត្រូវបាន​ដឹកយក​ទៅ​ស្នងការដ្ឋាន​នគរបាល​រាជធានី​ភ្នំពេញ​តែម្តង​អត់​មាន ទុក​យូរ​ទេ ។ ស្ត្រី​៣​នាក់​ដែល​ត្រូវ​ចាប់ខ្លួន ១-​ឈ្មោះ ហេង ពេជ្រ (​អ្នក​តវា​៉​បឹងកក់​) ២-​ឈ្មោះ ផុន ស្រី​ទូច (​អ្នក​តវ៉ា​បឹងកក់​) និង​៣-​ឈ្មោះ ភួង សុភាព (​អ្នក​តវា​៉​សហគមន៍​ថ្មគោល​) ចំណែក​សង្ឃ​ដែល​បាន​ឃាត់ខ្លួន​នាម ស៊ឹង ហៃ គង់នៅ​វត្ត​ស្ទឹងមានជ័យ ។ ក្នុងការ​ប្រទង់ប្រទាញ​គ្នា​នោះ​ក៏បាន​បណ្តាលឱ្យ​ស្ត្រី​ម្នាក់​ឈ្មោះ ផែ​ក ចាន់​រស្មី បាន​ដួលសន្លប់​ផងដែរ ។​
​សង្ឃ​មួយអង្គ​នាម ស៊ឹង ហៃ អាចឈាន​ទៅដល់​ការ​ផ្សឹក​ទៅជា​គ្រហស្ថ ដែល​តាម​ការចោទប្រកាន់​ថា សង្ឃ​អង្គ​នេះ​មាន​ឆាយា​លក្ខណ៍ មិន​ត្រឹមត្រូវ (​ក្លែងក្លាយ​) ។ ប៉ុន្តែ​ករណី​សង្ឃ​នេះ​ពាក់ព័ន្ធ​នឹង​ឆ្លងកាត់​ទៅដល់​គណៈសង្ឃ​ទើប​អាច ផ្សឹក​បាន ។ ចំណែក​ស្ត្រី​ទាំង​៣​នាក់​នឹង​អនុញ្ញាតឱ្យ​វិល​ទៅផ្ទះ​វិញ ដោយ​គ្រាន់តែ​ឱ្យធ្វើ​កិច្ចសន្យា​បញ្ឈប់​សកម្មភាព​របស់​ខ្លួន​តែប៉ុណ្ណោះ ។ គួរ​កត់សម្គាល់ថា នៅ​ព្រឹក​ថ្ងៃទី​១១ វិច្ឆិកា ដដែល គេ​ឃើញ​អ្នក​តវ៉ា​មកពី​សហគមន៍​បុរី​កីឡា រួមជាមួយ​អ្នក​តវ៉ា​មកពី​សហគមន៍​បឹងកក់ ប្រមាណ​ជាង​៣០​នាក់ បាន​លើកគ្នា​មក​មុខ​សាលា​រាជធានី​ភ្នំពេញ ដើម្បី​ស្រែក​ទាមទារ​សុំឱ្យ​ដោះលែង​គ្នា​គេ​៧​នាក់​ដែល​ត្រូវ​ចាប់ខ្លួន ។ ការ​មក​តវ៉ា​បែបនេះ បាន​ពិនិត្យឃើញថា ពួកគេ​អត់​ហ៊ាន​ឈរ​រារាំង​បិទផ្លូវ​ដូច​លើក​មុន​ទេ ហើយក៏​អត់​មាន​សមត្ថកិច្ច​ណា​រារាំង​អូសទាញ​ទាត់​ធាក់​ដែរ ។ ចំណែក​សាលា​រាជធានី ក៏​អត់​មាន​តំណាង​ណាមួយ​មក​ទទួលយក​ញត្តិ​តវ៉ា​អ្វី​ដែរ ។​
​ប្រហែល​ជាមួយ​ម៉ោង​ក្រោយមក ទំនង​មាន​ដំណឹង​ថា​មនុស្ស​៧​នាក់ ដែល​ចាប់ខ្លួន​នោះ ត្រូវបាន​បញ្ជូនទៅ​សាលាដំបូង​ដើម្បី​កាត់ទោស ពួកគេ​ក៏​នាំគ្នា​ចេញពី​មុខ​សាលា​រាជធានី ឆ្ពោះទៅ​សាលាដំបូង​វិញ ដើម្បី​ពូន​ជា​កម្លាំង ទើប​នៅមុខ​សាលាដំបូង​ឃើញ​មាន​មនុស្ស​កាន់តែច្រើន ។ ទោះជា​យ៉ាងនេះ​ក្តី តុលាការ​បាន​ដំណើរការ​តាម​នីតិវិធី​រហូតដល់​ចប់ ដោយ​ប្រកាស​ផ្តន្ទាទោស​ទៅតាម​ច្បាប់ នូវ​អ្នកណា​ក៏ដោយ​ឱ្យតែ​ខុស​អត់​មាន​ខ្លាច ឬ​ត្រា​ប្រណី​ឡើយ ។ សវនាការ​ផ្ទាល់​ត្រូវបាន​បញ្ចប់​នៅវេលា​ម៉ោង​៥​ល្ងាច ។ ប្រធាន​ក្រុមប្រឹក្សា​គឺ​លោក ម៉ុង មុនី​សោភា បានប្រកាស​សាលក្រម​ផ្ដន្ទាទោស​លើ​ស្ត្រី​ទាំង​៧​នាក់​នេះ​ដាក់ពន្ធនាគារ ក្នុង​ម្នាក់​១​ឆ្នាំ និង​ពិន័យ​ជា​ប្រាក់​ម្នាក់​២​លាន​រៀល ។ ក្រោយ​ប្រកាស​សាលក្រម​រួច​ស្ត្រី​បឹងកក់​៧​នាក់​នោះ​ត្រូវបាន​សមត្ថកិច្ច នាំខ្លួន​ភ្លាមៗ​ទៅកាន់​ពន្ធនាគារ​ព្រៃ​ស​តែម្ដង ៕10420772_356537384527020_6388879993299255122_n

Copyright © 2010-2021 · អរិយធម៌ · All Rights Reserved.
Develop by Sek Sathya