ភ្នំពេញ៖ ព្រះមហាក្សត្រ ព្រះបាទ ព្រះបរមនាថ នរោត្តម សីហមុនី និងសម្តេចម៉ែ មុនីនាថ សីហនុ កាលពីម៉ោង៩ព្រឹក ថ្ងៃចន្ទ ទី១២ សីហា នេះ បានយាងចាកចេញពីមាតុភូមិ ដើម្បីទទួលការពិនិត្យព្រះរាជសុខភាពនៅក្នុងទីក្រុងប៉េកាំង ប្រទេសចិន។ ការយាងចេញនេះមានការជូនព្រះរាជដំណើរដោយថ្នាក់ដឹកនាំកំពូលរបស់កម្ពុជា គឺលោក ហ៊ុនសែន និង លោក ហេង សំរិន ព្រមទាំង មន្ត្រីជាន់ខ្ពស់ជាច្រើននាក់ទៀត។
បើយោងទៅតាមព្រះរាជសាររបស់ព្រះករុណា ព្រះបរមនាថ នរោត្តម សីហមុនី បានផ្សាយតាមទូរទស្សន៍ជាតិកម្ពុជា ដោយបញ្ជាក់ថា ព្រះអង្គនឹងយាងមកឲ្យទាន់នៅក្នុងកិច្ចប្រជុំសភា នីតិកាលទី៥ ដែលនឹងប្រព្រឹត្តទៅនៅពេលខាងមុខនេះ។
ព្រះករុណា ព្រះមហាក្សត្រ មានតួនាទីកោះអញ្ជើញសមាជិករដ្ឋសភាដែលជាប់ឆ្នោត ដើម្បីចូលរួមកិច្ចប្រជុំលើកដំបូង ដើម្បីបើកនីតិកាលរដ្ឋសភាទី៥ យ៉ាងតិចរយៈពេល៦០ថ្ងៃបើតាមរដ្ឋធម្មនុញ្ញ ក្រោយថ្ងៃបោះឆ្នោតគិតចាប់ពីថ្ងៃទី២៨ ខែកក្កដា ឆ្នាំ២០១៣៕ ដោយៈ មករាតូច
