ឧត្ដរមានជ័យ៖ នៅថ្ងៃទី ២១ ខែ សីហា ឆ្នាំ ២០១៤ លោក ស ថាវី អភិបាល នៃគណៈអភិបាលខេត្តឧត្ដរមានជ័យ និង លោក យិន ធិន ប្រធាន ក្រុមប្រឹក្សាខេត្ត អមដំណើរដោយ អភិបាលរងខេត្ក ប្រធានមន្ទីរជុំវិញខេត្ត កងកម្លាំងទាំងបី អភិបាលស្រុកអន្លង់វែង លោកមេឃុំ ក្រុមប្រឹក្សាឃុំ និងមេភូមិបានចុះដោះស្រាយជម្លោះ ដីធ្លីជូនប្រជាពលរដ្ឋ ចំនួន ៨ ភូមិ ឃុំ អន្លង់វែង ស្រុក អន្លង់វែង ខេត្ត ឧត្ដរមានជ័យ ចំនួន ៣១៥ គ្រួសារ ស្មើ និង ៣៧៩ ក្បាលដី ស្មើ ១៦៨៣ ហិតា ជាដីដែលបានវាស់វែង និងមានបង្កាន់ដីរួចរាល់ ដែលប្រជាពលរដ្ឋ ខាងលើមានបញ្ហាដីធ្លី ជាមួយក្រុមហ៊ុន ទំរីងរ៉ាបប៊ឺ ។ ពិធីនេះរៀបចំឡើងនៅ ភូមិ យាងខាងជើង ឃុំ អន្លង់វែង ខណៈនោះផងដែរលោក លោកអភិបាលខេត្ត បានសម្រេចកាត់ដី ចេញពីក្រុមហ៊ុនដើម្បី ប្រគល់ជូន ប្រជាពលរដ្ឋវិញ។ ក្នុងឱកាសនេះដែរ ប្រជាពលរដ្ឋទាំង ៣១៥ គ្រួសារខាងលើ បានថ្លែងអំណរអរគុណ ចំពោះលោកអភិបាលខេត្ត យ៉ាងជ្រាលជ្រៅបំផុត ដែល លោកបានតែងតែយកចិត្តទុកដាក់ ដោះស្រាយបញ្ហាជូនប្រជាពលរដ្ឋជាច្រើនក្នុងខេត្ត ឧត្ដរមានជ័យ ដើម្បីឱ្យប្រជាពលរដ្ឋទូទាំងខេត្តរស់នៅក្នុង សុវត្ថិភាព សុខដុមរម្យនា និងភាពរីកចំរើន ៕ ពៅ
