ភ្នំពេញ ៖ រថយន្តពីរគ្រឿង បើកបុកគ្នាយ៉ាងពេញទំហឹង បណ្តាលឲ្យរងការខូចខាត យ៉ាងដំណំ កាលពីវេលាម៉ោង ២២ នឹង ៤០ នាទីយប់ថ្ងៃទី ២៤ ខែកក្កដា ឆ្នាំ ២០១៣ នៅតាមបណ្តោយផ្លូវព្រះមុនីរ៉េត សង្កាត់វាលវង់ ខណ្ឌ ៧ មករា ។

យោងតាមសេចក្តីរាយការណ៍ពីកន្លែងកើតហេតុបានឲ្យដឹងថា​មុនពេលមានគ្រោះថ្នាក់ នេះមានបុរស ម្នាក់ស្រវឹងស្រា​បានបើកបររថយន្តឡិចស៊ី​ស RX 300 ១គ្រឿង ពណ៌ស ពាក់ស្លាកលេខ ភ្នំពេញ 2X 4807 បើកបរក្នុងទិសដៅពីកើតទៅលិច តាម បណ្តោយ ផ្លូវព្រះមុនីរ៉េត ដោយបានបើកបរយ៉ាងលឿន ខណៈជិះដល់ ចំណុចកើតហេតុ ស្រាប់ តែរថយន្តឡិចស៊ីសនេះបានរេចង្កូតរថយន្តទៅបុកចំពីក្បាលរថយន្តហុងដាស្ព័រ ពណ៌ ទឹក ប្រាក់ ពាក់ស្លាកលេខ​ភ្នំពេញ 2U 2066 ដែលកំពុងបើកបរក្នុងទិសដៅពីលិច ទៅកើត ​បញ្រ្ចាសទិសគ្នាជាមួយ រថយន្តឡិចស៊ីស បណ្តាលឲ្យរថយន្តទាំង ២ គ្រឿង ត្រូវរងការខូចខាត ប៉ុន្តែមិនបណ្តាលឲ្យមនុស្សណាម្នាក់ ត្រូវរងរបួសធ្ងន់ធ្ងរ នោះទេ ។

បន្ទាប់ពីកើតហេតុសមត្ថកិច្ចមូលដ្ឋាន បានសហការជាមួយនគរបាលចរាចរណ៍ខណ្ឌ​៧ មករា ចុះវាស់​វែង អូសយករថយន្តទាំង ២ គ្រឿងទៅរក្សាទុកនៅអធិការដ្ឋាននគរបាល ខណ្ឌ ៧ មករា រង់ចាំដោះស្រាយ តាម​ផ្លូវច្បាប់ ។​ សមត្ថកិច្ចនៅមិនទាន់អត្តសញ្ញាណ អ្នកបើកបររថយន្តបង្កហេតុទាំង ២ គ្រឿងនេះ​ ប៉ុន្តែសមត្ថកិច្ច​បាន​បញ្ជាក់ថាគ្រោះ ថ្នាក់នេះបង្កឡើងដោយសារម្ចាស់រថយន្តឡិចស៊ីស ស្រវឹងស្រាជោគខ្លួន ហើយបើកបរ​លឿន ទើបរេចង្កូតជ្រុលបុករថយន្តហុងដាស្ព័រយ៉ាងពេញទំហឹងបែបនេះ ៕

ដោយ៖ ទុយ បញ្ញា