ថ្ងៃ | ការិ.ពាណិជ្ជកម្ម : 097 780 51 35 / 069 351 368 ការិ.និពន្ធ : 012 304 401 E-mail: areyathor@yahoo.com
Breaking News :
 មន្រ្តីច្រើននាក់ ទទួលបានផលប្រយោជន៍ពីគម្រោងស្តារបឹងបែកក្អម ស្រុកមុខកំពូល​  ||     ភ្ញាក់ផ្អើល! មន្ត្រីមួយចំនួនសើមមាត់ ដោយសារអាចម៍ដី លក់ឲ្យឈ្មួញមួយហិកតា តម្លៃ ៣ម៉ឺនដុល្លារ?​  ||     លោក ឈួន សោភា ទៅកាន់តំណែងជាប្រធានការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ , ធ្វើបាបនាយទាហាន ចាប់ឡានស្លាក(ខម) ដែលមានឯកសារពីក្រសួងការពារជាតិទៀត បង្កការភ្ញាក់ផ្អើល  នៅបន្ទាយមានជ័យ​  ||     ល្បី ! ឈ្មួញឈ្មោះ ចែស្រី សម្រុកដឹកជញ្ជូនឈើពីខេត្តព្រះវិហារ ចូលទៅខេត្តកំពង់ធំ​  ||     ភ្ញាក់ផ្អើល!  ឃុបឃិតគ្នា លួចកាយដីភ្នំលក់ ត្រូវក្រសួងរ៉ែនិងថាមពលចាប់ពិន័យ  ​  ||   

» Breaking News, ព័ត៌មានជាតិ » អួត​ស្រា​បៀរ​យកលុយ​ខ្លួនឯង​ថា​ជា​មោទនភាព​ជាតិ​ទៅ​កើត​!

អួត​ស្រា​បៀរ​យកលុយ​ខ្លួនឯង​ថា​ជា​មោទនភាព​ជាតិ​ទៅ​កើត​!

​ភ្នំពេញ ៖ ក្នុង​រដូវ​កាល​យុទ្ធនា​ការឃោសនា​រក​សំឡេងឆ្នោត​ប៉ុន្មាន​ថ្ងៃ​កន្លងមកនេះ កន្លែង​​ណា ទីណា​ក៏​ឮ​គេ និយាយ​ប្លែកៗ​ពីគ្នា​។ អ្នកខ្លះ​ថា​ដូរ​ឬ​មិន​ដូរ​? ខ្លះ​ថា​អត់ ខ្លះ​ថា​ដូរ ហើយ​កន្លែង​ខ្លះទៀត​គេ​នាំគ្នា​ជ្រេញ​ទៅនឹង​ក្រុម ហ៊ុន​ស្រា​បៀរ​មួយចំនួន ដោយ​ឃោស​នា​ប្រូ​រក​ប្រយោជន៍​ចូល​គ្រួសារ​ខ្លួន ក្រុមហ៊ុន​ខ្លួន​សោះ សុទ្ធតែ​ប្រើពាក្យ​ថា «​មោទនភាព​ជាតិ បេះដូង​ខ្មែរ​»​ទៅ​កើត​។

គេ​និយាយ​ហើយ​នាំគ្នា​វិភាគ​ថា យើង​យកលុយ​ទៅ​ទិញ​ស្រា​បៀរ​ផឹក​អស់​លុយ​យើង ស្រវឹង​យើង គ្រោះថ្នាក់​ចរាចរណ៍ យើង ខូចសុខភាព​យើង រីឯ​ក្រុមហ៊ុនស្រា​បៀរ​គេ​កើប​លុយ​យក​យ៉ាង​ស្រួល ដោយ​គេ​មិន​គិតពី​សុខទុក្ខ​ពួកយើង ផង​ហ្នឹង​។ មិនតែប៉ុណ្ណោះ គេ​ឡង់សេ​ក្តែ​ងៗ​ថា «​មោទនភាព​ជាតិ បេះដូង​ខ្មែរ​ឯណា​ឆ្កុយ​ទៅវិញ​ឯណោះ​» តើ មាន​អ្នក​ផឹកស្រា​បៀរ​ច្រើន ខូចសុខភាព​ច្រើន នេះ​ជា​មោទនភាព​ជាតិ​ដែរ​ឬ​? បើ​ជនបរទេស​គេ​ស្តាប់ទៅ​ប្រាកដ ជា​គេ​យល់ថា ប្រទេស​កម្ពុជា​ពោរពេញ​ទៅដោយ​អ្នក​ផឹកស្រា​បៀរ​ជាក់​ជាមិនខាន​នោះទេ​។

គេ​និយាយថា មោទនភាព​ជាតិ​ឬ​បេះដូង​ខ្មែរ​នេះ វា​ទាល់តែ​ក្រុមកីឡា​ខ្មែរ​ទៅ​ប្រកួត​នៅ​ក្រៅ​ប្រទេស រួច​ឈ្នះ បាន​មេដាយ​យកមក​ប្រទេស យកមក​ជូន​ក្រសួង​អប់រំ​យុវជន​និង​កីឡា ទើប​គេ​ហៅថា មោទនភាព​ជាតិ ឬក៏​ដាក់ ប្រាសាទខ្មែរ​យើង​នានា ចូល​ជា​បេតិក​ភណ្ឌ​ពិភពលោក ទើប​គេ​ហៅថា មោទនភាព​ជាតិ​និង​បេះដូង​ខ្មែរ​។ មិន មែន​គ្រាន់តែ​ចេះ​ផលិត​ស្រា​បៀរ លក់​ឲ្យ​គេ​ផឹក​យកលុយ​ដាក់​ក្រុមហ៊ុន​ខ្លួន​ឬក៏​ចូល​ក្រុមគ្រួសារ​ខ្លួន​ថា ជា មោទនភាព​ជាតិ​និង​បេះដូង​ខ្មែរ​ដែរ នោះ​វា​មិន​ឡូ​ហ្សិ​ក​ទេ​។ ម្យ៉ាងវិញទៀត​ស្តាប់​ការ​ឡង់​សេ​​យូរៗ​ទៅ​ពិតជា ជ្រេញ​ស្លឹកត្រចៀក​ខ្លាំងណាស់​។ បើតាម​ការ​ស្ទាបស្ទង់​មតិ​ឃើញថា ប្រជាពលរដ្ឋ​ខ្មែរ​ភាគច្រើន​មិន​ចង់​ឮ​ក្រុមហ៊ុន ស្រា​បៀរ​នោះ​ស្រែកថា មោទនភាព​ជាតិ បេះដូង​ខ្មែរ​ទៀត​ទេ គួរតែ​ដូរ​ចេញ​ហើយ​។​

ផ្នែក​អាណាចក្រ​និង​ផ្នែក​ព្រះពុទ្ធសាសនា សុទ្ធតែ​បាន​ទូន្មាន​និង​ប្រដៅ​មនុស្ស​ទូទៅ​ថា «​កុំ​ឲ្យ​ឆ្កួតស្រា ស្រី ល្បែង​» ក្នុងចំណោម​បី​ប្រការនេះ ទោះបីជា​ងប់​ង​ល់​ឬក៏​លង់​ក្នុង​ប្រការ​ណាមួយ​ក៏ដោយ គឺ​គ្រោះថ្នាក់​ទាំងអស់​។ ក្នុងនោះ ស្រា​ធ្វើ​ឲ្យ​ខូចសុខភាព វង្វេងស្មារតី​និង​អស់​លុយ រីឯ​ស្រី​ធ្វើ​ឲ្យ​យើង​បែកបាក់​គ្រួសារ ព្រាត់ប្រាស់​ប្រពន្ធ កូន​ជាដើម ហើយ​ល្បែង​ធ្វើ​ឲ្យ​អស់​លុយ ចងក​សម្លាប់ខ្លួន អស់​លុយ​បែកគំនិត​ប្លន់​គេ​ជាដើម​។

បើ​ស្តាប់​ការ​ទូន្មាន​ទាំងនេះ ក្រសួង​ព័ត៌មាន​មិនគួរ​អនុញ្ញាត​ឲ្យ​គេ​ផ្សាយ​ឡង់សេ​ស្រា​ឬ​ស្រា​បៀរ​លើ​កញ្ចក់​ទូរ ទស្សន៍​ឬក៏​តាម​កាសែត​នោះទេ​។ គេ​និយាយទៀតថា បើ​ស្រា​ឬ​ស្រា​បៀរ​ផ្សាយបាន​យ៉ាងនេះ វា​អយុត្តិធម៌​ចំពោះ ក្រុមហ៊ុន​បារី​ណាស់ ព្រោះ​ស្រា​និង​ស្រា​បៀរ​វា​ក៏​ជា​គ្រឿង​ធ្វើ​ឲ្យ​មនុស្ស​គ្រោះថ្នាក់​ដូច​បារី​ដែរ​ហ្នឹង ចុះ​ហេតុអ្វី​បារី ផ្សាយ​មិន​បាន ហើយ​ស្រា​ឬ​ស្រា​បៀរ​ផ្សាយបាន​? សរុបសេចក្តី​ទៅ​ការផ្សាយ​របស់​ក្រុមហ៊ុនស្រា​ឬ​ស្រា​បៀរ ឃោសនា​មាន​មហា​រលក​រង្វាន់​ប្រូ​នេះ ប្រូ​នោះ គឺជា​ការអូសទាញ​យុវជន​និង​មនុស្ស​ចាស់​ឲ្យ​ធ្លាក់​ក្នុង​គ្រោះថ្នាក់ ដោយ​មិនដឹង​ខ្លួន​។ អ្នកខាតបង់​គឺ​អ្នក​ផឹក​និង​ប្រទេស​ជាតិ​ជួប​នូវ​ឧបសគ្គ​ជាច្រើន រីឯ​អ្នក​ចំណេញ​គឺ​ក្រុមហ៊ុនស្រា ឬ​ស្រា​បៀរ​ទាំងអស់នោះ​ទៅ​វិញ​ទេ​។ ប៉ុន្តែ​បើ​ស្រា​ឬ​ស្រា​បៀរ​នោះ រាជរដ្ឋាភិបាល​ជា​អ្នក​ផលិត​ដើម្បី​រក​ការងារ​ឲ្យ​ខ្មែរ រក​ចំណូល​ឲ្យ​ខ្មែរ ទើប​សម​នឹង​ប្រើពាក្យ​ថា «​មោទនភាព​ជាតិ​និង​បេះដូង​ខ្មែរ​បាន​»​។

ទាំងអស់នេះ​ជាការ​យល់ ឃើញ​របស់​សាធារណជន នៅតាម​ទីកន្លែង​ខុសៗ​គ្នា ដែល​គេ​និយាយ​។ ដោយឡែក​សំរាប់​កាសែត​អរិយធម៌​មិន ហ៊ាន​បកស្រាយ​ថា យ៉ាងណា​នោះទេ ព្រោះនេះ​ជាការ​ប្រកួតប្រជែង​រប​ស់​អ្នករកស៊ី​។ ការផ្សាយ​របស់​ក្រុមហ៊ុន ស្រា​ឬ​ស្រា​បៀរ​ជា​កិច្ចការ​រកស៊ី​រក​ចំណេញ រីឯ​អ្នក​ផឹក​ឯណោះ​ទេ ដែល​រក​ទុក្ខ​ដាក់​ខ្លួនឯង​នោះ​៕
​ដោយ​៖​តា​បណ្ឌិត

Copyright © 2010-2021 · អរិយធម៌ · All Rights Reserved.
Develop by Sek Sathya