ថ្ងៃ | ការិ.ពាណិជ្ជកម្ម : 097 780 51 35 / 069 351 368 ការិ.និពន្ធ : 012 304 401 E-mail: areyathor@yahoo.com
Breaking News :
 ផ្ទះ​ទទួល​ទិញ​នៅ​ផល​ចោរកម្ម​ពី​ឡាន​ដឹក​ប្រេងឥន្ធនៈ​តេ​លា​មួយកន្លែង កំពុង​លួច​សំ​ង៉​ទិញ​យ៉ាង​រំភើយ​  ||     ចាប់​ឡាន​ដឹកឈើ​ប្រណិត​មួយគ្រឿង មិនបាន​មួយ​ដង្ហើមចង្រិត​លែង​វិញ​បាត់​  ||     ធ្លាយ​រឿង​អំពើពុករលួយ ជួសជុល​និង​លាប់ថ្នាំ​តិចតួច នៅ​អគារ​ធំ ផ្នែក​ខ្លះ​នៃ​ជា​ន់ទី២និង​ទី៣ មន្ទីរពេទ្យ​លោកសង្ឃ ចំណាយលុយ​រដ្ឋ ជិត១លាន​ដុល្លា (៣ ១២០លាន​រៀល) សង្ស័យ​ប្រធាន​ពេទ្យ លោក តាន់ សុគន្ធ ចំណេញ​គ្រប់ទឹក?​  ||     មេព្រៃ​ខេត្តក្រចេះ មើលមិនឃើញ​ក្រុម​រកស៊ី​ដឹកឈើ​ប្រណីត​តាម​រថយន្ត​យី​ឌុប សាំ​យ៉ុង ម៉ូតូ​ជាច្រើន​គ្រឿង ដែល​ដឹក​តាម​ដងផ្លូវ​ជា​រៀងរាល់ថ្ងៃ សង្ស័យ​ត្រូវ​ថ្នាំ​សណ្ដំ​ឈ្មួញ​  ||     បែកធ្លាយ​លុយ៥ម៉ឺន​ដុល្លា​សម្រាប់​រត់ការ​ដាក់​ឆ្នុក​បំផ្លាញ​ម​ឆ្ឆា​ជាតិ ជូន​ដល់​អង្គភាព​ពាក់​ព័​ន្ឋ​ខេត្តកំពង់ធំ?​  ||   

» ប្រវត្តិសាស្រ្ត » ​ព្រះរាជ​ជីវប្រវត្តិ​ ភាគទី4 : ព្រះមហាក្សត្រ​វ័យក្មេង​ និង ​ល្បែង​ស្នេហា ( ត​ពី​លេខ​មុន )

​ព្រះរាជ​ជីវប្រវត្តិ​ ភាគទី4 : ព្រះមហាក្សត្រ​វ័យក្មេង​ និង ​ល្បែង​ស្នេហា ( ត​ពី​លេខ​មុន )

​    ​ចំណែក​ទេសាភិបាល​ជាន់ខ្ពស់​បារាំង លោក​ហ្គោ​ត​ជេរ​វិញ ក៏បាន​បញ្ជាក់បន្ថែម​ច្បាស់​ថា ទោះ​ក្នុងករណី​ណាក៏ដោយ​ក៏​ប្រទេស​បារាំង​ប្រឆាំង​ដាច់ខាត​ចំពោះ​ការ​អភិសេក​នេះដែរ​។​
​    ​ដោយ​អស់សង្ឃឹម​ក្នុង​រឿង​ស្នេហា​ជាមួយ​ព្រះ​នាង​ស៊ីសុវត្ថិ​ពង្ស​សាន្ត​មុនី ព្រះមហាក្សត្រ​ក៏បាន​ចូល​សុំ​ព្រះ​មាតាបិតា​បោះបង់ចោល​រាជសម្បត្តិ​ដើម្បី​ធ្វើការ​គាបសង្កត់​ទៅលើ​ព្រះ​មាតាបិតា​វិញ​។​តែ​ត្រូវ​ព្រះ​មាតា​កុសុមៈ​ចោទសួរ​ទៅ​ព្រះអង្គ​ថា តើ​បុត្រ​ចង់​ឲ្យ​គេ​សើចចំអក ដូច ស្តេច​អេ​ឌួ​អាដ៍​ទី​៨​នៃ​ចក្រភព​អង់គ្លេស​កាលពី​៦​ឆ្នាំមុន​ដែល​សុខចិត្ត​បោះបង់​រាជសម្បត្តិ​ដើម្បី​រៀប​អាពាហ៍ពិពាហ៍​ជាមួយ​ស្រី​មេម៉ាយ​ជា​ជនជាតិ​អាមេរិក​ដែល​បាន​លែងលះ​ប្តី​២​ដង​មកហើយ​គឺ​អ្នកស្រី​សាំ​សុន​ឬ​…?
    ​ព្រះមហាក្សត្រ​ព្យាយាម​ពន្យល់​មាតា​វិញ​ថា​មិនអាច​យក​ព្រះ​នាង​ពង្ស​សាន្ត​មុនី​ទៅ​ប្រៀបប្រដូច​នឹង​អ្នកស្រី​សាំ​សុន​បានជា​ដាច់ខាត ព្រោះ​ព្រះ​នាង​ជាប់​ខ្សែលោហិត​ជា​រាជវង្ស​យើង ហើយ​ជា​ស្រី​ក្រមុំ​ព្រហ្មចារី មុននឹង​ព្រម​ប្រគល់​សេចក្តីស្នេហា​មក​ឲ្យ​បុត្រ​។ តែ​ត្រូវ​ព្រះ​មាតា កុសុមៈ​តប​វិញ​ថា រាល់​សកម្មភាព​ទាំងអស់​របស់​ព្រះមហាក្សត្រ​នឹងត្រូវ​គេ​ចារ​ទុក​ក្នុង ក្រាំង​ប្រវត្តិសាស្ត្រ​។​ដូច្នេះ​ចូរ​បុត្រ​ចេះ​បារម្ភ​ខ្លាចក្រែង​ប្រវត្តិវិទូ​កត់ត្រា​ថា បុត្រ​បាន​ចំណាយ​ពេលវេលា​មិនសូវ​ប្រកបដោយ​កិត្តិយស ព្រោះតែ​រឿង​ស្វះ​ស្វែងរក​ការ​ត្រេកត្រអាល​និង​ខ្ជីខ្ជា​ក្នុង​ព្រះរាជកិច្ច​ដឹកនាំ​ប្រទេស​។​
​    ​ព្រះ​មាតា​បន្ថែមទៀតថា ស្តាប់​មាតា​ណា​បុត្រ ! ប្រសិនបើ​ថ្ងៃ​ណាមួយ​បុត្រ​សម្រេច​ព្រះទ័យ​ដាក់រាជ្យ​ព្រោះតែ​បុត្រ​ទាមទារ​ឯករាជ្យ​ឲ្យ​ប្រទេសជាតិ​មិនបាន​នោះ គឺ​សកម្មភាព​នេះ​នឹង​ត្រូវបាន​ចារ​ក្នុង​ប្រវត្តិសាស្ត្រ​ដោយ​ការគោរព​និង​កោតសរសើរ​ពី​សំណាក់​ប្រជារាស្ត្រ​និង​ពិភពលោក​។​ប៉ុន្តែ​បើ​បុត្រ​បោះបង់​រាជសម្បត្តិ​ព្រោះតែ​ស្រី​ម្នាក់​ទោះបី​ស្រី​នោះ​ជា​ក្រមុំ​ព្រហ្មចារី​បរិសុទ្ធ​ក៏ដោយ ក៏​ជា​រឿង​អាម៉ាស់​មួយ​ដែល​ព្រះ​មាតាបិតា​មិនអាច​ទ្រាំទ្រ​បានឡើយ ហើយ​នេះ​គឺជា​ការប្រមាថ​មួយ​យ៉ាងធ្ងន់ធ្ងរ​ចំពោះ​ប្រជារាស្ត្រ​ដែល​កំពុង​ស្រឡាញ់​គាំទ្រ​បុត្រ​ផងដែរ​។​
​    ​បន្ទូល​ព្រះ​មាតា កុសុមៈ​នេះ ក៏​ធ្វើ​ឲ្យ​ព្រះបិតា សុរា​ម្រឹត ប៉ះទង្គិច​ក្នុង​ព្រះទ័យ​មិន​ស្ទើរ​ដែរ ព្រោះ ទ្រង់​ផ្ទាល់​ក៏​កំពុង​ស្រឡាញ់​យ៉ាង​ងប់​ង​ល់​ទៅលើ​នាដកា​ដ៏​ស្រស់ស្អាត​ម្នាក់​ឈ្មោះ យាប​។ តែ​ទ្រង់ មិន​បញ្ចេញ​ប្រតិកម្ម​អ្វី​ក្រៅពី​ងក់​ព្រះ​កេស​យ៉ាង​តក់​ម៉ក់ ជា​សញ្ញា​យល់ស្រប​នឹង​ការលើកឡើង​នូវ​ហេតុផល ដ៏​ត្រឹមត្រូវ​របស់​ព្រះ​មាតា​។​
​    ​នៅ​ទីបំផុត ព្រះមហាក្សត្រ ក៏​យល់ព្រម​បោះបង់ចោល​នូវ​ព្រះរាជបំណង​ដាក់រាជ្យ​វិញ ប៉ុន្តែ​ទោះបី ជាមាន​ការឃាត់​ឃាំងរ​នាំ​ង​ពី​ព្រះបិតា​មាតា និង​មានការ​ខឹងសម្បា​ពី​សំណាក់​អគ្គទេសាភិបាល ហ្ស​ង់ ដឺ​គូ យ៉ាងណាក៏ដោយ ក៏​ព្រះអង្គ​នៅតែ​បង្កាត់ភ្លើង​ស្នេហា​ជាមួយ​ព្រះ​នាង​ពង្ស​សាន្ត​មុនី បន្តទៅទៀត ដោយ​គ្មាន​អានុភាព​អ្វី​ពន្លត់​បានឡើយ​។​
​    ​ស្នេហា​រវាង​ព្រះមហាក្សត្រ និង​ព្រះ​នាង ពង្ស​សាន្ត​មុនី មក​រយៈពេល​៩​ឆ្នាំ គឺ​ចាប់ពី​ឆ្នាំ​១៩៤២​ដល់ ឆ្នាំ​១៩៥១ ទើប​សាប​រលត់ទៅវិញ ដោយ​បន្សល់ទុក​នូវ​បុត្រាបុត្រី​ចំនួន​៧​អង្គ គឺ ១-​ព្រះអង្គម្ចាស់ នរោត្តម យុវនាថ ដែល​ក្រោយ​រដ្ឋប្រហារ ថ្ងៃទី​១៨ ខែមីនា ឆ្នាំ​១៩៧០ ទ្រង់​បាន​រត់​ចេញពី​របប សាធារណរដ្ឋ​ខ្មែរ​របស់លោក​សេនាប្រមុខ លន់ នល់ ទៅ​ចូលរួម​ចលនា​តស៊ូ​រណសិរ្ស​រួបរួម​ជាតិ​កម្ពុជា ដែលមាន​សម្តេចឪ សម្តេច​តា ជា​ព្រះប្រធាន​។ ក្រោយ​ពួក​ខ្មែរក្រហម​ទទួលបាន​ជ័យជម្នះ​លើ​របប សាធារណរដ្ឋ​ខ្មែរ ថ្ងៃទី​១៧ ខែមេសា​ឆ្នាំ​១៩៧៥ ទ្រង់​បាន​បដិសេធ មិន​ត្រឡប់​ចូលមកក្នុង​របប​កម្ពុ​ជា ប្រជាធិបតេយ្យ​វិញ​ទេ ហើយ​បាន​ចាក​ចេញពី​ក្រុង​ប៉េកាំង ទៅ​រស់នៅ​ទីក្រុង​ហុងកុង​ជាមួយ​ភរិយា​និង  កូនៗ យ៉ាង​កំសត់​បំផុត​។ សព្វថ្ងៃ​ទ្រង់​យុវនាថ នៅមាន​ព្រះជន្ម​នៅឡើយ​។​
២-​ព្រះអង្គម្ចាស់ នរោត្តម​រក្ស​វី​វង្ស មាន​សញ្ញាបត្រ​ថ្នាក់​បរិ​ញ្ញា​តាំងពី​សម័យ​សង្គមរាស្ត្រនិយម​។ ក្រោយ រដ្ឋប្រហារ​ថ្ងៃទី​១៨​ខែមីនា​ឆ្នាំ​១៩៧០ ទ្រង់​រត់​ចូល​ព្រៃ​តស៊ូ​ប្រឆាំងនឹង​របប លន់ នល់​។ ប្រហែល​ក្នុង​ឆ្នាំ ១៩៧៣ ទ្រង់​ត្រូវ​បាត់បង់​ព្រះជន្ម នៅក្នុង​ព្រៃ​ដោយសារ​មាន​ជំងឺ​ធ្ងន់ធ្ងរ​។​
៣-​ព្រះអង្គម្ចាស់ នរោត្តម​ចក្រ​ព​ង្ស់ ជា​នាយទាហាន​ក្នុង​អង្គភាព​អាកាសចរណ៍​ភូមិន្ទ​កម្ពុជា ទ្រង់​បន្ត​រស់ នៅក្នុង​របប​សាធារណរដ្ឋ​ខ្មែរ រហូតដល់​ឆ្នាំ​១៩៧៣ ទើប​ទៅ​ចូលរួម​ជាមួយ​សម្តេចឪ សម្តេច​តា ដែល កំពុង​និរទេស​ព្រះកាយ​នៅ​ទីក្រុង​ប៉េកាំង​។ ក្រោយ​ខ្មែរក្រហម​ឡើងកាន់​អំណាច​ឆ្នាំ​១៩៧៥ ទ្រង់​បាន ភៀសខ្លួន​ទៅ​រស់​នៅឯ​ប្រទេស​បារាំង​។ ក្រោយ​ឆ្នាំ​១៩៧៩ ទ្រង់​បាន​ចូលរួម​ដឹកនាំ​ចលនា​តស៊ូ ហ្វ៊ុន ស៊ិនប៉ិច ទៅ​ព្រំដែន​កម្ពុជា​-​ថៃ​។ ក្រោយ​កិច្ចព្រមព្រៀង​សន្តិភាព​ក្រុងប៉ារីស ២៣​ខែតុលា ឆ្នាំ​១៩៩១ ទ្រង់ បាន​ចុះចូល​ជាមួយ​របប​រដ្ឋ​កម្ពុជា របស់​គណបក្ស​ប្រជាជន​កម្ពុជា ដោយ​ទទួល​តួនាទី​ជា​អនុប្រធាន ក្រុមប្រឹក្សារដ្ឋមន្ត្រី​។ សព្វថ្ងៃ​ទ្រង់​នៅមាន​ព្រះជន្ម​នៅឡើយ​។​
៤-​ម្ចាស់​ក្សត្រិយ នរោត្តម សុរិយា​រង្សី ជា​បុត្រី​មួយអង្គ​ដែល​ព្រះមហាក្សត្រ​សព្វព្រះទ័យ​បំផុត ស្មើនឹង បុត្រី នរោត្តម​គន្ធ​បុ​ប្ជា​ដែរ​។ នៅពេល​ព្រះ​នាង​ភៀសខ្លួន​ទៅ​រស់នៅ​ទីក្រុង​ប៉េកាំង​ជាមួយ​បិតា ព្រះ​នាង បាន​រៀបការ​ជាមួយ​វិស្វករ​ខ្មែរ​កុ​ម្មុយ​និ​ស្ត​ម្នាក់ ដែល​បាន​ទៅ​សិក្សា​នៅ​ប្រទេស​អាល្លឺម៉ង់​ខាងកើត​។ នៅ ក្នុង​ខែកញ្ញា​ឆ្នាំ​១៩៧៥ ព្រះ​នាង​និង​ស្វាមី ព្រមទាំង​កូនៗ​បាន​តាម​ដង្ហែ​សម្តេចឪ សម្តេច​តា យាង​ចូល ប្រទេស​វិញ​។ ក្រោយ​សម្តេចឪ សម្តេច​តា លាលែង​ពី​តំណែង​ប្រមុខរដ្ឋ​ក្នុង​របប​កម្ពុជា​ប្រជាធិបតេយ្យ ខែមេសា ឆ្នាំ​១៩៧៦ ព្រះ​នាង​និង​គ្រួសារ ត្រូវ​ពួក​ខ្មែរក្រហម​ជម្លៀស​ឲ្យ​ទៅ​រស់នៅ​តំបន់​ព្រៃភ្នំ​ជនបទ ហើយក៏​បាត់​ដំណឹង​សូន្យឈឹង តាំងពី​ពេលនោះ​មក​។
៥-​ម្ចាស់​ក្សត្រិយ នរោត្តម​គន្ធ​បុ​ប្ជា ជា​បុត្រី​សំណព្វ​ព្រះទ័យ​ជាងគេ​ក្នុងចំណោម​បុត្រ​ទាំងអស់​។ ព្រះ​នាង កើត​នៅក្នុង​ឆ្នាំ​១៩៥២ ហើយ​ត្រូវ​សុគត ដោយ​ជំងឺ​ខ្វះ​ឈាមក្រហម ក្នុង​ព្រះជន្ម​៤​វស្សា​។​

៦-​ព្រះអង្គម្ចាស់​នរោត្តម ខេ​មា​នុ​រក្ស ក្រោយ​រដ្ឋប្រហារ​ថ្ងៃទី​១៨ ខែមីនា ១៩៧០ ទ្រង់​បាន​ចូល​បំរើ​ក្នុង ជួរ​កងទ័ព​រណសិរ្ស​រួបរួម​ជាតិ​កម្ពុជា ប្រឆាំងនឹង​របប លន់ នល់ ដែល​ក្នុងពេលនោះ លោក​ហ៊ូ នឹម រដ្ឋមន្ត្រីក្រសួង​ឃោសនាការ បាន​ទទួលយក​ទ្រង់​ទៅគ្រប់​គ្រង​មើល​ការខុសត្រូវ និង​ជួយ​ដល់​ការងារ    លោក​។ ក្នុង​ខែកញ្ញា ១៩៧៥ ទ្រង់​បានមក​ជួប​សម្តេចឪ ម្តង​នៅ​ទីក្រុង​ភ្នំពេញ​។ លុះ​មួយខែ​ក្រោយមក ទ្រង់​ក៏​បាត់​ដំណឹង​សូន្យឈឹង​រហូតដល់​សព្វ​ថ្ងៃ​។​
៧-​ម្ចាស់​ក្សត្រិយ នរោត្តម បុ​ទុម​បុ​ប្ជា ជា​បុត្រី ពៅ របស់​ព្រះ​នាង​ស៊ីសុវត្ថិ ពង្ស​សាន្ត​មុនី​។ ព្រះអង្គ​បាន រៀបការ​ជាមួយ​ទ្រង់​ស៊ីសុវត្ថិ ឌូ​ស្សា​ឌី (​ត្រូវជា​ក្មួយ​របស់​ព្រះ​នាង​)​។ ក្រោយមក​ក៏បាន​លែងលះគ្នា ហើយ​ទៅ​រៀបការ​ជាមួយ​នាយទាហាន​ជា​អ្នកបើក​យន្តហោះ​ម្នាក់​ឈ្មោះ​សូ​ភ័​ក្រា​។ ទ្រង់​ស៊ីសុវត្ថិ ឌូ​ស្សា​ឌី ក៏បាន​ចូលរួម​តស៊ូ​ក្នុង​ជួរ​រណសិរ្ស​រួបរួម​ជាតិ​កម្ពុជា​ដែរ ។ ឯ​លោក សូ​ភ័​ត្រា នៅក្នុង​ឆ្នាំ​១៩៧២ ពេល​កំពុងបើក​យន្តហោះ នៅក្នុង​ជួរ​កងទ័ព​របប​សាធារណរដ្ឋ​ខ្មែរ លោក​បាន​បើក​យន្តហោះ​ទម្លាក់ គ្រាប់បែក​លើ​វិមាន​រដ្ឋ​ចំការមន ដែល​លោក​សេនាប្រមុខ លន់ នល់ ស្នាក់នៅ​ទីនោះ ក្នុង​គោលបំណង ធ្វើឃាត​លោក លន់ នល់ តែ​មិន​ត្រូវចំ​គោលដៅ ហើយ​បាន​ទៅ​ជួប​សម្តេចឪ នៅ​ទីក្រុង​ប៉េកាំង​។ ចំណែក​ម្ចាស់​ក្សត្រិយ បុ​ទុម​បុ​ប្ជា តស៊ូ​ប្រឆាំងនឹង​របប​សាធារណរដ្ឋ​ខ្មែរ​ដោយផ្ទាល់ ហើយ​ត្រូវបាន តុលាការ​របប​នោះ ផ្តន្ទាទោស​ឲ្យ​ព្រះអង្គ​ជាប់ពន្ធនាគារ​អស់​ជាច្រើន​ខែ​ពីបទ​ធ្វើ​វិទ្ធង្សនា​។ ក្រោយពេល ដោះលែង​ពី​ពន្ធនាគារ​វិញ ព្រះ​នាង​ក៏បាន​ទៅ​ជួប​សម្តេចឪ នៅ​ទីក្រុង​ប៉េកាំង​ដែរ​។​
​    ​ក្រោយ​ជ័យជម្នះ​របស់​ពួក​ខ្មែរក្រហម ថ្ងៃទី​១៧​ខែមេសា​១៩៧៥ ព្រះ​នាង​និង​ស្វាមី ព្រមទាំង​កូនៗ បាន​វិលត្រឡប់​ចូលមក​មាតុប្រទេស​វិញ នៅ​ខែមេសា​១៩៧៦ បាន​បំបែក​ចេញពី​សម្តេចឪ បាត់​ដំណឹង រហូតដល់​សព្វថ្ងៃនេះ​។​
​    ​បុត្រាបុត្រី​របស់​ម្ចាស់​ក្សត្រិយ ស៊ីសុវត្ថិ ពង្ស​សាន្ត​មុនី ទាំង​ប៉ុន្មាន ក្រោយ​រដ្ឋប្រហារ​ថ្ងៃ​១៨ ខែមីនា ១៩៧០ សុទ្ធតែ​បានមក​ចូលរួម​ក្នុង​ចលនា​តស៊ូ​ប្រឆាំងនឹង​របប លន់ នល់​។ ប៉ុន្តែ​ម្ចាស់​ក្សត្រិយ​ពង្ស សាន្ត​មុនី​ផ្ទាល់ រស់នៅក្នុង​ទីក្រុង​ភ្នំពេញ ក្រោម​ការដឹកនាំ​របស់​លោក​សេនាប្រមុខ លន់ នល់ រហូត ពេល​កងទ័ព​ខ្មែរក្រហម​ជិត​ដណ្តើមបាន​ទីក្រុង​ភ្នំពេញ​ទាំងស្រុង ម្ចាស់​ក្សត្រិយ​ក៏​ទទួលមរណភាព​ទៅ​។​
​    ​ឥឡូវនេះ​យើង​ត្រឡប់​ទៅ​មើល​ប្រវត្តិ​ស្នេហា​របស់​ព្រះមហាក្សត្រ​បន្តទៀត តើ​ត្រូវ​ជួប​កូន​ប្រជារាស្ត្រ សាមញ្ញ ឬក៏​ជា​ខ្សែ​រាជវង្ស​ដែរ​? នៅក្នុង​ឆ្នាំ​១៩៤៤ ពេល​កំពុង​ជួប​រឿង​ស្នេហា​ជាមួយ​អ្នក​ម្នាង ផាត់ កា​ញ៉ុ​ល បាន​បុត្រ​២​អង្គ គឺ​នរោត្តម​បុ​ប្ជា​ទេវី និង​នរោត្តម រណ​ឫ​ទិ្ធ និង​ស្នេហា​ដែល​រង​ការរិះគន់​ខ្លាំង​បំផុត ជាមួយ​ម្ចាស់​ក្សត្រិយ​ពង្ស​សាន្ត​មុនី​នេះដែរ ព្រះមហាក្សត្រ​បាន​ចាប់​ព្រះទ័យ​ស្នេហា​ទៅលើ​ម្ចាស់   ក្សត្រិយ ស៊ីសុវត្ថិ មុនី​នេ​សាន ជា​បុត្រី​ព្រះ​អ​យ្យិ​កោ ព្រះមុនីវង្ស និង​ស្នំ​ម្នាក់​ឈ្មោះ​តាត ពោលគឺ​ត្រូវជា ម្តាយមីង​របស់​ព្រះអង្គ ដូច​ម្ចាស់​ក្សត្រិយ ស៊ីសុវត្ថិ ពង្ស​សាន្ត​មុនី​ដែរ​។​
​    ​នៅក្នុង​ឆ្នាំ​១៩៤៦ ម្ចាស់​ក្សត្រិយ​មាន​បុត្រ​មួយអង្គ គឺ​ព្រះអង្គម្ចាស់​នរោត្តម នរៈ​ទី​ប៉ោ​។ ទ្រង់​បាន បន្ត​ការសិក្សា​នៅ​ប្រទេស​ចិន និង​ត្រូវបាន​ប្រជារាស្ត្រ​ស្រឡាញ់​គាំទ្រ​រហូត​សង្ឃឹមថា ទ្រង់​នឹង​ឡើង គ្រង​រាជសម្បត្តិ​បន្ត​ពី​សម្តេចឪ​សម្តេច​តា​។ ប៉ុន្តែ​គួរ​ឲ្យ​សោកស្តាយ​បំផុត គឺ​ក្រោយ​ទ្រង់​សម្រាល​ពី​ផ្ទៃ​មាតា បានតែ​ប៉ុន្មាន​ម៉ោង​ប៉ុណ្ណោះ ព្រះ​មាតា​ក៏បាន​បាត់បង់​ព្រះជន្ម​ទៅ​។ ចំណែកឯ​ទ្រង់ នរៈ​ទី​ប៉ោ ក៏ត្រូវ​បាន ពួក​ខ្មែរក្រហម​យកទៅ​សម្លាប់​នៅក្នុង​ឆ្នាំ​១៩៧៥​។​
​    ​ក្នុង​ឆ្នាំ​១៩៤៦​នោះដែរ ព្រះមហាក្សត្រ ក៏បាន​ជួប​ស្នេហា​ថ្មី​មួយទៀត ជាមួយនឹង​ម្ចាស់​ក្សត្រិយ នរោត្តម នរ​លក្ខណ៍ ជា​បុត្រី ពៅ របស់​ម្ចាស់​ក្សត្រិយ ស៊ីសុវត្ថិ​ថា​វេត ដែល​ត្រូវជា​បងស្រី​បង្អស់​របស់ ព្រះ​មាតា កុសុមៈ ពោលគឺ​ម្ចាស់​ក្សត្រិយ នរ​លក្ខណ៍ ត្រូវជា​បងប្អូនជីដូន​មួយ​របស់​ព្រះមហាក្សត្រ​។​
​    ​ក្សត្រិយ នរ​លក្ខណ៍ មាន​ស្វាមី​ដើម​គឺ​ព្រះអង្គម្ចាស់ នរោត្តម គិរី​វ័ន ហើយ​បាន​លែងលះគ្នា​នៅក្នុង​ឆ្នាំ ១៩៤៥ ហើយ​ម្ចាស់​ក្សត្រិយ​អង្គ​នេះ ត្រូវបាន​សម្តេចឪ លួច​រៀបចំ​ពិធី​អភិសេក​(​រៀបការ​) ជាមួយ ក្រោយ​ថ្ងៃ​ដាក់​រាជសម្បត្តិ​ថ្វាយ​ព្រះបិតា​នរោត្តម​សុរា​ម្រឹត​ក្នុង​ឆ្នាំ​១៩៥៥ គឺ​ឆ្លៀត​ពេលដែល​ព្រះ​មាតា កុសុមៈ កំពុង​ជាប់រវល់​យ៉ាង​មមាញឹក ក្នុងការ​រៀបចំ​ពិធី​ឡើង​គ្រងរាជ្យ​របស់​ព្រះបិតា​ព្រះអង្គ​៕
​ដោយ ៖ ឈឹម ប៉ាវ​

Copyright © 2010-2017 · អរិយធម៌ · All Rights Reserved.
Develop by Sek Sathya