ប៉េកាំង៖ ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃសុក្រ ទី១៤ ខែមីនា ឆ្នាំ២០១៤ ដោយផ្អែកតាមការផ្សាយ ព័ត៌មានលោកខាងលិចថា «ដោយឡែក ការបិទប្រព័ន្ធទំនាក់ទំនងចំនួនពីរផ្សេងគ្នា ពីការបាត់ខ្លួននៃយន្តហោះនោះ គឺបានកើតឡើងក្នុងពេលខុសគ្នា ដែលបង្ហាញនូវការបាត់ដំណឹងនោះថា ហាក់ដូចជាបណ្តាលមកពី ទង្វើដោយចេតនាណាមួយ ជាជាងកើតឡើងដោយគ្រោះមហន្តរាយធម្មជាតិ»។
ចំណែកអ្នកស៊ើបអង្កេតរបស់អាមេរិកវិញ បានជឿជាក់តាមរយៈការស៊ើបអង្កេតម្តងមួយៗ ហើយមួយក្នុងចំណោមប្រភពទាំងនោះ បានប្រាប់ ABC ថា ឧបទ្ទវហេតុនេះ មិនមែនកើតឡើងដោយគ្មានហេតុផលនោះទេ។ អ្នកវិភាគអាកាសចរណ៍ ABC លោក ចន ណាន់ បានប្រាប់ស៊ីអិនអិនថា «នេះជាការចាប់ផ្តើមជាមួយគ្នាដើម្បីនិយាយថា ហេតុការណ៍ដែលបានកើតឡើង ជាប្រភេទនៃទង្វើដោយចេតនា»។
ប្រសិនបើការបាត់ដំណឹងរបស់យន្តហោះនោះ កើតឡើងដោយគ្រោះមហន្តរាយមែន វានឹងមានការផ្ទុះកើតឡើង ឬក៏មានដំណើរការម៉ាស៊ីនខុសប្រក្រតី និងប្រព័ន្ធហាក់ដូចជា បញ្ឈប់បញ្ជូនក្នុងពេលតែមួយ ឬក៏ក្នុងរយៈពេលយ៉ាងខ្លី ប៉ុន្តែនេះគឺវាបានពន្យាពេលរហូតដល់ ១៤នាទី។
ជាមួយគ្នានោះដែរ កាសែត វ៉លស្ទីត របស់អង់គ្លេសបានផ្សាយថា ក្រុមអ្នកស៊ើបអង្កេតបានសង្ស័យ ចំពោះការបាត់ខ្លួនយន្តហោះថា យន្តហោះបានហោះ អស់រយៈពេលប្រមាណ ៤ម៉ោង បន្ទាប់ពីវាទៅដល់ទីតាំង ដែលស្គាល់ចុងក្រោយ។ ទាំងនេះហើយជាហេតុដែលក្រុមស្រាវជ្រាវ និងសង្គ្រោះ គួរតែពង្រីកការរុករករបស់ខ្លួន ទៅដល់សមុទ្រឥណ្ឌា៕
