ព្រះសីហនុៈ នៅព្រឹក ថ្ងៃទី២៧ ខែមករា ឆ្នាំ២០២១នេះ លោកឧត្តមសេនីយ៍ទោ ជួន ណារិន្ទ ស្នងការនគរបាល ខេត្តព្រះសីហនុ បានប្រាប់ឲ្យដឹងថា ករណីជនល្មើស ជាជនជាតិចិន បាញ់សម្លាប់ជនជាតិចិន ដូចគ្នា នៅជិតវត្តឥន្ទញ្ញាណ ក្រុងព្រះសីហនុ កាលពីព្រឹកថ្ងៃទី២១ មករា កន្លងទៅនេះ គិតមកដល់ថ្ងៃទី២៧ មករា នេះ នគរបាល បានចាប់ខ្លួនជនសង្ស័យ ចំនួន៣នាក់ហើយ និងបានបង្កសំណុំរឿង បញ្ជូនខ្លួន ទៅសាលាដំបូងខេត្ត បន្តនីតិវិធីច្បាប់ រួចរាល់ហើយ។
ជនល្មើសដែលជាជនជាតិចិន ដូចគ្នា ក្នុងនោះមានជន ដៃដល់ម្នាក់ និងបក្ខពួកគូកន សមគំនិត ចំនួន ២ នាក់ ហើយនគរបាលក៏ដកហូតបាន វត្ថុតាង ព្រមទាំងថ្នាំញៀន មួយចំនួនផង។ ក្នុងចំណោមក្រុមជនសង្ស័យ មានខ្លះត្រូវបាន នគរបាល ចាប់ឃាត់ខ្លួន តាំងពីថ្ងៃកើតហេតុ មកម្ល៉េះ មុននឹងឈានទៅដល់ការចាប់ខ្លួន បក្ខពួកបន្ត។
ករណីនេះ សមត្ថកិច្ច កំពុងបន្តកិច្ចការ តាមរកបក្ខពួកជនល្មើស ដែលនៅសេសសល់ និងធ្វើនីតិវិធីបញ្ជូនជន សង្ស័យ ទៅផ្តន្ទាទោសតាមច្បាប់ ៕
