ភ្នំពេញ: គណបក្សប្រជាជនកម្ពុជា បានព្រមព្រៀង តាមសំណើរបស់គណបក្សសង្គ្រោះជាតិ លើសមាសភាព ៧ រូប ម្ខាង ក្នុងគណៈកម្មការចម្រុះ សម្រាប់កែទម្រង់ការបោះឆ្នោត។ គណបក្សប្រជាជនកម្ពុជា ក៏បានដាក់ចេញរួចហើយ នូវសមាសភាព ៧ រូប របស់ខ្លួន ក្នុងគណៈកម្មការចម្រុះនោះ។ នេះបើតាមលោក ជាម យៀប បញ្ជាក់។
ដែលជាសមាជិកមួយរូប ខាងគណបក្សប្រជាជនកម្ពុជា ក្នុងគណៈកម្មការចម្រុះ សម្រាប់កែទម្រង់ការបោះឆ្នោត បានឲ្យដឹងថា សមាសភាព ៧ រូប ខាងគណបក្សប្រជាជនកម្ពុជា ក្នុងគណៈកម្មការចម្រុះនោះ គឺដឹកនាំដោយលោក ប៊ិន ឈិន។
តែយ៉ាងណាក៏ដោយ លោក ជាម យៀប មិនទាន់បញ្ជាក់ថា ក្រុមការងារ ឬក៏គណៈកម្មការចម្រុះថ្មី រវាងគណបក្សប្រជាជនកម្ពុជា និងគណបក្សសង្គ្រោះជាតិ នឹងជួបប្រជុំគ្នា នៅពេលណានោះទេ។
សូម រម្លឹកថា កាលពីរសៀលថ្ងៃទី២០ ខែកុម្ភៈ ឆ្នាំ២០១៤ ក្រៅពីប្រកាសបន្តកិច្ចចរចាជាមួយគណបក្សប្រជាជនកម្ពុជា លោក កឹម សុខា អនុប្រធានគណបក្សសង្គ្រោះជាតិ ក៏បានឲ្យដឹងថា គណបក្សសង្គ្រោះជាតិ តាមរយៈលោក សុន ឆ័យ ប្រធានក្រុមការងារចរចា ក៏បានបញ្ជូនសំណើរួចហើយ ទៅកាន់គណបក្សប្រជាជនកម្ពុជា ដើម្បីបង្កើតគណៈកម្មការចម្រុះ កែទម្រង់ការបោះឆ្នោត ដោយមានសមាសភាពស្មើគ្នា គឺម្ខាងៗ ៧ រូប៕
