ភ្នំពេញ៖ អំណាចព្រះអគ្គិភ័យពិតជាសាហាវនិងគ្មានមេត្តាបានឆាបឆក់យកផ្ទះប្រជាពលរដ្ឋអស់៣ខ្នងទាំងព្រឹក នៅក្រោយវត្តនន្ទមុនី ស្ថិតក្នុង ក្រុមទី៥ ភូមិដំណាក់ធំ១ សង្កាត់ស្ទឹងមានជ័យ ខណ្ឌមានជ័យ ផ្តើមចេញពីផ្ទះម្ចាស់មិននៅ សង្ស័យបណ្តាលមក ពីទុស្សេខ្សែភ្លើង។
លោកម៉ៅ សាវឿន ដែលបានដឹកនាំសមត្ថកិច្ចអន្តរាគមន៍នៅកន្លែងកើតហេតុ បានឲ្យដឹងថា អគ្គិភ័យនេះ បានចាប់ផ្តើមនៅវេលាម៉ោង ៧ព្រឹកថ្ងៃទី១៤ ខែតុលា ឆ្នាំ២០១៣។ សមត្ថកិច្ចបញ្ជាក់ទៀតថា ផ្ទះចំនួន៣ខ្នង ធ្វើពីថ្មប្រក់សង្ក័សី រួមនិងទ្រព្យសម្បត្តិមួយចំនួនទៀត ត្រូវបានអគ្គិភ័យឆាបឆេះអស់ទាំងស្រុង។
លោកម៉ៅ សាវឿន នាយនគរបាលប៉ុស្តិ៍ស្ទឹងមានជ័យ បានឲ្យកាសែតអរិយធម៌ដឹងថា ករណីនេះកម្លាំងនគរបាលពន្លត់អគ្គិភ័យ បានបញ្ចេញរថយន្តពន្លត់អគ្គិភ័យចំនួន ៧គ្រឿងទៅកាន់ កន្លែងកើតហេតុ និងអន្តរាគមន៍ បាញ់ពន្លត់ភ្លើងឲ្យរលត់ទៅវិញទាំងស្រុងនៅវេលាម៉ោង ៨ព្រឹកថ្ងៃដដែល ដោយ មិនបណ្តាលឲ្យរាលដាលធ្ងន់ធ្ងរទៅផ្ទះ
អ្នកដទៃទៀតនោះឡើយ។
បើតាមសមត្ថកិច្ចខាងពន្លត់អគ្គិភ័យ បានអះអាងថា ផ្តើមចេញពីផ្ទះមួយ ដែលម្ចាស់មិននៅផ្ទះ ហើយសង្ស័យថា បណ្តាលមកពី ទុស្សេខ្សែភ្លើង៕ ដោយ៖ នាយដន
