ថ្ងៃ | ការិ.ពាណិជ្ជកម្ម : 097 780 51 35 / 069 351 368 ការិ.និពន្ធ : 012 304 401 E-mail: areyathor@yahoo.com
Breaking News :
 ល្បី!  អាជ្ញាធរស្រុកជាប់ព្រំដែនខេត្តតាកែវ ជួលស្រែប្រាំងឲ្យជនជាតិវៀតណាមធ្វើ ?​  ||     បទល្មើសព្រៃឈើ នៅតែកើតឡើងយ៉ាងរាលដាល តំបន់ព្រៃសហគមន៍ប្រាសាទទឹកខ្មៅ ស្រុកសំបូរ ខេត្តក្រចេះ​  ||     សកម្មភាពបទល្មើសនេសាទកើត មានយ៉ាងកក្រើកនៅក្នុងស្រុកចំនួន ២ ស្រុក នៅក្នុងខេត្តកំពង់ឆ្នាំង​  ||     រោងសិប្បកម្ម របស់ឈ្មោះ សេង អត់ច្បាប់ដ៏ធំសម្បើមមួយកន្លែង សមត្ថកិច្ចមិនដែលបង្ក្រាប​  ||     ល្បែងស៊ីសងកើតឡើងយ៉ាងរាលដាល ស្រុកត្បូងឃ្មុំ សមត្ថកិច្ចមិនបង្ក្រាប​  ||   

» Breaking News, ព័ត៌មានជាតិ » លោក​រដ្ឋមន្ត្រី លឹម គានហោ និង​ក្រុមការងារ​ជួយសង្គ្រោះ​ពលរដ្ឋ​មិនចេះ​នឿយហត់​

លោក​រដ្ឋមន្ត្រី លឹម គានហោ និង​ក្រុមការងារ​ជួយសង្គ្រោះ​ពលរដ្ឋ​មិនចេះ​នឿយហត់​

បាត់ដំបង​៖ ប្រតិបត្តិការ សម្រុក​ធ្វើ ទាំងយប់​ទាំង​ថ្ងៃ​គ្មាន​ការ​សម្រាក របស់​ក្រុមការងារ បាន​ធ្វើឡើង​តាមរយៈ​ការដឹកជញ្ជូន​ដុំថ្ម​ធំៗ និង​ដី​ចាក់​លុប​មាត់ទឹក ដែលមាន​ប្រវែង​៣០​ម៉ែត្រ និង​ជម្រៅ​៣​ម៉ែត្រ​។  ការចាក់​ដុំថ្ម ដើម្បី​ភ្ជិត​មាត់ទឹក នៃ​អាង​កំពីងពួយ មិន​ងាយស្រួល ដូច​អាន​កាសែត ឬ​មើល​ទូរទស្សន៍​នោះទេ វា​ជាការ​លំបាក​បំផុត ទំរាំ​បិទ
​ជិត​ជា​ស្ថាពរ​នោះ​។​
​ក្រោយពី​បាន បញ្ចេញ​ប្រតិបត្តិការ ទាំងយប់ ទាំង​ថ្ងៃ ដោយ​គ្មាន​ការ​សម្រាក​រួចមក នៅវេលា​ម៉ោង ប្រមាណ​៣​ទៀបភ្លឺ​ចូល​ថ្ងៃទី​១៣ ខែតុលា ឆ្នាំ​២០១៣ ការបិទ​ភ្ជិត​មុខទឹក អាង​កំពីងពួយ ដែលមាន​ទីតាំង​ស្ថិតនៅ ស្រុក​បាណន់ ខេត្តបាត់ដំបង បានបញ្ចប់​ជា​ស្ថាពរ ក្រោម​ការដឹកនាំ​បញ្ជា​ផ្ទា​ល់ពី សំណាក់​លោក​រដ្ឋមន្ត្រី លឹម គានហោ ។​
​ក្រុមការងារ របស់​ក្រសួង​ធនធានទឹក បាន​យក​ដើមឈើ​ដ៏​ធំ និង​មាន​ប្រវែង​ប្រមាណ​៥​ម៉ែត្រ ទៅ​ដាក់​កាត់​ទទឹង ដើម្បី​កុំ​ឲ្យ​ទឹក​ហូរ​ខ្លាំងពេក ងាយស្រួល​ចាក់​ថ្ម​ចូល ប៉ុន្តែ​ដោយសារតែ កម្លាំង​ទឹក​ហូរ​ខ្លាំងពេក ដើមឈើ​ដែល​អេស្កាវ៉ាទ័រ ទម្លាក់​កាត់​ទទឹង​នោះ ក៏​ហូរ​ទៅ​ក្រោម​បាត់​ដែរ​។ ឃើញ​ដូច្នេះ លោក​រដ្ឋមន្ត្រី លឹម គានហោ បាន​ណែនាំ​ឲ្យ​ក្រុមការងារ របស់លោក​ដែល​កំពុង​ប្រតិបត្តិ​នោះ ព្យាយាម និង​រិះរក​វិធីសាស្ត្រ​ថ្មី ដើម្បី​បិទ​ភ្ជិត​ឲ្យ​ខាងតែបាន​។​
​ដោយសារ​មាន​អ្នកមាន​ជំនាញ និង​ធ្លាប់​ឆ្លងកាត់​ការងារ​ជាច្រើនលើក ទើប​ក្រុមការងារ​បិទ​ភ្ជិត​មាត់​អាង ដោយ​ដាក់​ថ្ម និង​ដី​ក្រាល​ពីលើ បានបញ្ចប់​ជា​ស្ថាពរ​និង​ជោគជ័យ នៅវេលា​ម៉ោង​ប្រមាណ​៣​ទៀបភ្លឺ​ឆ្លង​ចូល​ថ្ងៃទី​១៣ ខែតុលា ឆ្នាំ​២០១៣​។​
តាម​ការពិនិត្យ​ជាក់ស្តែង របស់​អ្នកយកព័ត៌មាន អរិយធម៌ តាំង​ពីថ្ងៃ​រហូតដល់​យ​ប់ ឃើញថា ការចាក់​ភ្ជិត​មាត់ទឹក ពី​ចំណុច​ចាប់ផ្តើម គឺមាន​ភាពងាយស្រួល​ប​ន្តិ​ច ដោយ​មុខកាត់ នៃ​មាត់ទឹក​មាន​ទំហំ​ធំ ដូច្នេះ​ល្បឿន​នៃ​ទឹក​ហូរ មិនសូវ​ខ្លាំង​នោះឡើយ​។ ប៉ុន្តែ​អ្វីដែល​មានការ​លំបាក កាន់តែខ្លាំង​នោះ គឺ​នៅពេល​ចាក់​បិទ​ជិត​មាត់ទឹក​ជិត​ដល់​ត្រើយម្ខាង គឺ​ល្បឿន​ទឹក​ហូរ​កាន់តែខ្លាំង ព្រោះ​មុខទឹក​កាន់តែ​តូច ធ្វើ​ឲ្យ​ល្បឿន​ទឹក​បុក​កាន់តែខ្លាំង ហើយ​បើ​យក​ដុំថ្ម​ធំៗ ទៅ​ចាក់​ចូល​យ៉ាងណាក្តី ក៏​មិនអាច​ទប់​នឹង​កម្លាំង​ទឹក​បុក​បានដែរ ពីព្រោះ​ទឹក​ហូរ​ខ្លាំងណាស់ និង​មាន​ជម្រៅ​ជ្រៅ​។​
​លោក លឹម គានហោ ដែល​ចុះមក​បញ្ជា​ផ្ទាល់ នៅ​ទំនប់​អាង​កំពីង ពួយ បាន​មានប្រសាសន៍ថា ប្រតិ​ប​ត្ដិ​ការបិទ​ភ្ជិត មុខ​អាង បាន​ធ្វើឡើង​ទាំងយប់​ទាំង​ថ្ងៃ ដោយ​ប្រើ​គ្រឿងចក្រ ប្រមាណ ២០​គ្រឿង ដើម្បី​ដឹកជញ្ជូន​ថ្ម​និង ដី​យកមក​ចាក់​ភ្ជិត ។ លោក​បាន​បន្ដថា សម្រាប់​ការចំណាយ​ទូទៅ គឺ​ការទិញ​ថ្ម​ជាង ៣០០​រថយន្ត​បែន ក្នុង​មួយ​រថយន្ដ​តម្លៃ ៧០​ដុល្លារ​​ទោះជា​យ៉ាងណា ក៏​លោក​បាន​អះអាងថា នេះ ជាការ​បិទ​ភ្ជិត​មាត់​អាង ជា​បណ្ដោះអាសន្ន ខណៈដែល​ទំនប់​អាង​មួយ​នេះ ស្ថិតក្រោម ការជួសជុល រវាង​រដ្ឋាភិបាល​កូរ៉េ និង​រាជរដ្ឋាភិបាល​កម្ពុជា តាមរយៈ​ក្រសួង​ធនធាន ទឹក ។​
​មន្ត្រី​ក្រសួង​ធនធានទឹក បាន​ថ្លែង​ឲ្យ​ដឹងថា អាងទឹក​កំពីងពួយ ជា​កន្លែង​ស្តុក​ទឹក សម្រាប់​ស្រោចស្រព​ដ៏​ធំ​មួយ នៅក្នុង​ខេត្តបាត់ដំបង និង​ជា​រមណីយដ្ឋាន​ដ៏ ទាក់ទាញ មួយ​ផងដែរ ស្ថិតនៅក្នុង​ឃុំ​តា​គ្រាម ស្រុក​បាណន់ ខេត្តបាត់ដំបង មាន​ចម្ងាយ ៣៥​គីឡូម៉ែត្រ ពី​ទី​រួម​ខេត្ត និង​ចម្ងាយ​១៩​គីឡូម៉ែត្រ ពី​ផ្លូវជាតិ​លេខ​៥៧ អតីត​ផ្លូវជាតិ​លេខ​១០ ត្រង់​ចន្លោះ​ភ្នំ​ក្រពើ និង​ភ្នំ​ទ្រុងមាន់ និង​នៅ​ចន្លោះ​ភ្នំ​ពីរ គឺ​ភ្នំ​គល់ និង​ភ្នំ​តា​ង៉ែ​ន​។ ទំនប់​អាង​កំពីងពួយ មាន បណ្តោយ ៧.៥០០​ម៉ែត្រ និង​ទទឹង  ១.៩០០​ម៉ែត្រ អាច​ផ្ទុក​ទឹកបាន ១១០​លាន​ម៉ែត្រគូប ។​
​ប្រជាពលរដ្ឋ​និយាយថា បើ​ពុំមាន​ចំណាត់ការ ភ្លាមៗ ពី​សំណាក់​លោក​រដ្ឋមន្ដ្រីក្រសួង​ធនធានទឹក និង​អាជ្ញាធរ​ខេត្ដ បាត់ ដំបង កាយ​មាត់ទឹក នៃ​អាង​កំពីងពួយ​ទាន់ពេលវេលា​នោះទេ គ្រោះមហន្ដរាយ អាច​ប៉ះពាល់​យ៉ាងធ្ងន់ធ្ងរ​ជាង​នេះ ប្រសិនបើ​ទំនប់​អាង​ត្រូវបាន​បាក់ ហើយ​ប្រជាពលរដ្ឋ​នៅ​ទូទាំង​ខេត្ដ បាត់ដំបង​នឹងរង ផល ប៉ះពាល់​យ៉ាងខ្លាំង ។ ប៉ុន្ដែ​ការបើក​មាត់ទឹក​អាង ដែលមាន បណ្ដោយ ៣០​ម៉ែត្រ និង​ជម្រៅ ៣​ម៉ែត្រ គ្រាន់តែ​ប៉ះពាល់​ប្រជាពលរដ្ឋ​នៅ​ផ្នែក​ខាង ក្រោម​ជិត ១​ពាន់​គ្រួសារ​ប៉ុណ្ណោះ ដោយ ប្រជាពលរដ្ឋ​ទាំងនោះ ត្រូវបាន​អាជ្ញាធរ ខេត្ដ​ជួយ​ជម្លៀសចេញ ទៅកាន់​ទីទួល​មាន សុវត្ថិភាព​រួចស្រេច​ទៅហើយ ៕ ដោយ​៖ ព្រហ្ម ពៅ​

Copyright © 2010-2021 · អរិយធម៌ · All Rights Reserved.
Develop by Sek Sathya