បន្ទាយមានជ័យ: ប្រភព នានា បានប្រាប់ថ្ងៃទី១១តុលាថា គិតត្រឹមល្ងាចថ្ងៃទី១១ តុលានេះ ទឹកជំនន់បង្កពីភ្លៀង កន្លងមក ទឹកធ្លាក់ពីខេត្តឧត្តរមានជ័យនិងទឹកមកពីប្រទេសថៃ បានស្រកចុះបណ្ដើរៗកម្រិតមធ្យមនៅក្រុងប៉ោយប៉ែត ស្រុកម៉ាឡៃ អូរជ្រៅ ស្វាយចេក និងថ្មពួក។ ទឹកស្រកយឺតៗ នៅស្រុកព្រះនេត្រព្រះ និងភ្នំស្រុក។ ប៉ុន្តែនៅក្រុងសិរីសោភ័ណ ជាទីរួមខេត្ត និងស្រុកមង្គលបូរី ជាស្រុកមានពលរដ្ឋច្រើនជាងគេរបស់ខេត្តរស់នៅនោះ ទឹកជំនន់ បានឡើងលិចបន្ថែមទៀត។ ផ្នែកខាងត្បូង ខាងកើត និងលិច នៃក្រុងសិរីសោភ័ណ បានលិចលង់កាន់តែធ្ងន់ រហូតដល់កណ្ដាលក្រុង។
ខណៈពេលដែលទឹកជំនន់បង្កពីទឹកភ្លៀង ពីខេត្តឧត្តរមានជ័យ និងមួយចំនួន ធ្លាក់ពីប្រទេសថៃនោះ បានស្រកចុះ នៅក្រុងប៉ោយប៉ែត ស្រុកម៉ាឡៃ ស្រុកអូរជ្រៅ ស្វាយចេក ថ្មពួក ក្នុងចំនួនច្រើន និងស្រកតិចតួច នៅស្រុកព្រះនេត្រព្រះ និងភ្នំស្រុកនោះ ប៉ុន្តែទឹកជំនន់ បានបន្តវាយប្រហារយ៉ាងខ្លាំង លើក្រុងសិរីសោភ័ណ ជាទីរួមខេត្ត និង
ស្រុកមង្គលបូរី នៅខាងត្បូងខេត្ត។ ក្រុង និងស្រុកទាំងពីរនេះ ជាតំបន់ ដែលមានពលរដ្ឋច្រើនជាងគេ ក្នុងខេត្តបន្ទាយមានជ័យ។
ឯទីរួមស្រុកមង្គលបូរី និងឃុំស្ទើរទាំងអស់ ក៏ត្រូវលិចលង់ ដែលទឹកមានកម្ពស់ខ្ពស់ជាងមុន។ ចំណែកផ្លូវជាតិលេខ៥ ក្នុងក្រុងសិរីសោភ័ណ និងស្រុកមង្គលបូរី ជិតពាក់កណ្ដាល ត្រូវបានទឹកជំនន់លិចហូរកាត់កាន់តែជ្រៅ។
លោក ទ្រី ណារិន អភិបាលខេត្តបន្ទាយមានជ័យ និយាយជាសាធារណៈ នៅថ្ងៃទី១១ ឲតុលាថា ទឹកជំនន់ បន្តវាយប្រហារខ្លាំងក្រុងសិរីសោភ័ណ។ ចំណែកនៅតំបន់ខ្លះទៀត បានស្រកចុះបន្តិចហើយ។ ទឹកជំនន់ នៅខេត្តបន្ទាយមានជ័យ ជាប់ព្រំដែនថៃ បានប៉ះពាល់ប្រជាពលរដ្ឋ ៣ ម៉ឺនគ្រួសារ។ ក្នុងនោះ ជាង ៥០០ គ្រួសារ ត្រូវជម្លៀសពីផ្ទះលិចទឹក ទៅកាន់ទីទួលសុវត្ថិភាព៕
