បន្ទាយមានជ័យ ៖ លោក ទ្រី ណារិន អភិបាល ខេត្តបន្ទាយមានជ័យ បានឲ្យដឹងនៅថ្ងៃទី០៧ ខែតុលា ឆ្នាំ២០១៣នេះ ថា ដោយស្ថានភាព ជំនន់ទឹកភ្លៀង និងទឹកជំនន់ហូរ ធ្លាក់ពីថៃ កាន់តែខ្លាំងជាងមុន លោក បានបន្ថែមកម្លាំង យោធាកងពល៥១ និងកម្លាំងនគរបាល រហូតដល់ជាង ១០០០នាក់ ចុះទៅ ច្រកដីដាក់ការ៉ុងទប់ទំនប់នៅអាង
ត្រពាំងថ្ម ក្នុងស្រុកភ្នំស្រុក ដើម្បីទប់ស្កាត់ការ បាក់ជំនប់គឺ អាចធ្វើឲ្យជន់លិចលំនៅដ្ឋាន ស្រែចំការ ដំណាំដាំដុះ របស់ ប្រជាពលរដ្ឋ កាន់តែខ្លាំងជាងមុន។
ជាមួយគ្នានេះ នៅក្នុងប្រតិបត្តិការខាងលើនេះ ក៏មានការចូលរួមពីសំណាក់ មន្ត្រីជាន់ខ្ពស់ក្រសួងធនធានទឹក និងប្រជាពលរដ្ឋជាច្រើននាក់ផងដែរ។
ភ្លៀងនៅតែបន្តធ្លាក់ ទាំងយប់ ទាំងថ្ងៃ ធ្វើឲ្យ ខេត្តបន្ទាយមានជ័យ ទាំងមូល រងការលិចលង់ ដោយទឹកជំនន់ ទឹកភ្លៀង និងទឹកជំនន់ ហូរធ្លាក់ពីប្រទេសថៃ យ៉ាងគំហុក ហើយ ស្រុក-ក្រុងទាំង៩ រួមមាន លំនៅដ្ឋាន ប្រជាពលរដ្ឋ សាលារៀន មន្ទីរពេទ្យ មណ្ឌលសុខភាព វត្តអារាម អាគាររដ្ឋបាលនានា ផ្លូវលំ បេតុង ផ្លូវជាតិ បានលិចលង់ ស្ទើរគ្រប់កន្លែង ធ្វើឲ្យពលរដ្ឋជាច្រើន គ្រួសារបាន បង្ខំចិត្តរត់រក ទីទួលសុវត្ថិភាព ដើម្បីស្នាក់នៅ បណ្តោះអាសន្ន៕
ដោយ៖ សម្បត្តិ សីហា
