ភ្នំពេញ: អ្នកនាំពាក្យកិច្ចប្រជុំកំពូលរបស់គណបក្សទាំងពីរ បានរាយការណ៍ប្រាប់អ្នកកាសែតថា កិច្ចប្រជុំថ្ងៃនេះ មានការខិតជិតគ្នា កាន់តែជិត ហើយគណបក្សទាំងពីរ នឹងខិតខំរកចំណុចរួមមួយ អោយបានមុនកិច្ចប្រជុំលើកដំបូង របស់រដ្ឋសភា នៅថ្ងៃទី២៣ ខែកញ្ញា។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បាននិយាយថា កិច្ចប្រជុំបានពិភាក្សា ទៅលើការធ្វើកំណែទម្រង់ស្ថាប័នជាតិជាច្រើន ហើយយើងបានប្រឹងប្រែងរកលទ្ធភាព ដើម្បីធ្វើយ៉ាងណាអោយគម្លាតកាន់តែតូចទៅៗ។
ចំណែកលោក ប្រាក់ សុខុន អ្នកនាំពាក្យកិច្ចប្រជុំខាងគណបក្សប្រជាជនកម្ពុជាវិញ បាននិយាយស្រដៀងគ្នានេះ។ លោកបានចាត់ទុកការប្រជុំថា មានការយោគយល់គ្នាច្រើន។
ចំពោះបញ្ហាប្រជុំសភានៅថ្ងៃទី២៣ ខែកញ្ញា វិញ លោក ប្រាក់សុខុន បាននិយាយថា ការពន្យារពេល ឬមិនពន្យារពេលនោះ គឺអាស្រ័យទៅលើព្រះមហាក្សត្រ មិនមែនអាស្រ័យលើគណបក្សទេ។អ្នកនាំពាក្យទាំងពីរបានប្រកាសថា ថ្នាក់ដឹកនាំគណបក្សទាំងពីរ បានព្រមព្រៀង ដកឃ្លា ទៅជជែកគ្នាផ្ទៃក្នុងសិន ទើបវិលមកជួបប្រជុំឡើងវិញ។ តែមិនទាន់កំណត់ថ្ងៃនៅឡើយ។
កិច្ចប្រជុំប្រមាណ ៣ ម៉ោង នៅព្រឹកមិញ មិនមានចេញសេចក្តីថ្លែងការណ៍ទេ ដោយអះអាងថា ចាំឯកភាពគ្នា ទើបប្រកាសជូនអ្នកកាសែត៕
