ភ្នំពេញ៖ យ៉ាងហោចណាស់ មានមុស្ស៣នាក់បានស្លាប់ ៤នាក់រងរបួសធ្ងន់ ខណៈ ៥៦នាក់ផ្សេងទៀត រងរបួសស្រាល់ ក្នុងគ្រោះថ្នាក់ចរាចរណ៍ ទូទាំងប្រទេសចំនួន ៧លើក (យប់ ៣លើក) នៅថ្ងៃទី៥ ខែសីហា ឆ្នាំ២០១៥ម្សិលមិញ នេះបើយោងតាមការចុះផ្សាយ របស់គេហទំព័រអគ្គស្នងការនគរបាលជាតិ។
ប្រភពព័ត៌មានដដែលបញ្ជាក់ទៀតថា ក្នុងគ្រោះថ្នាក់ចរាចរណ៍ទាំង ៧លើកនេះ បានបង្កឲ្យខូចខាតយានយន្តសរុប ១១គ្រឿង ក្នុងនោះមានម៉ូតូចំនួន ១០គ្រឿង និងរថយន្តធុនតូច ១គ្រឿង ហើយមូលហេតុដែលបណ្តាល ឲ្យមានគ្រោះថ្នាក់រួមមាន ល្មើសល្បឿន ៣លើក, មិនគោរពសិទ្ធ ១លើក, ស្រវឹង ១លើក, មិនប្រកាន់ស្តាំ ១លើក និងកត្តាអាកាសធាតុ ១លើក ។ ចំពោះអ្នកជិះម៉ូតូគ្រោះថ្នាក់ ដោយមិនបានពាក់មួកសុវត្ថិភាពចំនួន ១៣នាក់ (យប់ ៣នាក់) ។
ជាមួយគ្នានេះ នៅថ្ងៃម្សិលមិញ កម្លាំងនគរបាលចរាចរណ៍ បានធ្វើការផាកពិន័យរថយន្តសរុបចំនួន ៨៥៧គ្រឿង (រថយន្តធំ ១៨៩គ្រឿង) ស្មើនឹង ៨៥៧ករណី ល្មើសក្រដាសស្នាមមាន ៦៨៥គ្រឿង ស្មើនឹង ៦៨៥ករណី, ចំពោះករណីល្មើសបច្ចេកទេស ១៧២គ្រឿង ស្មើនឹង ១៧២ករណី ដោយឡែកម៉ូតូ ត្រូវបានពិន័យសរុបចំនួន ១.៦៧៣គ្រឿង។
លោកឧត្តមសេនីយ៍ឯក រុន រ័ត្នវាសនា ប្រធាននាយកដ្ឋានសណ្ដាប់ធ្នាប់ នៃអគ្គស្នងការដ្ឋាននគរបាលជាតិ បានឲ្យដឹងថា ដើម្បីកាត់បន្ថយនូវគ្រោះថ្នាក់ចរាចរណ៍ និងបង្កើតការយល់ដឹង ដល់អ្នកបើកបរ អំពីច្បាប់ចរាចរណ៍ផ្លូវគោកថ្មីនោះ នាយកដ្ឋានសណ្តាប់ធ្នាប់ និងស្នងការរងទទួលផែនសន្តិសុខ សណ្តាប់ធ្នាប់ គ្រប់រាជធានីខេត្តទាំងអស់ បានបង្កើតសមត្ថភាព ត្រួតពិនិត្យតាមផ្លូវជាតិសំខាន់ៗ ដើម្បីបង្កើនឲ្យមានប្រសិទ្ធភាព នៃការអនុវត្តន៍ច្បាប់ចរាចរណ៍ផ្លូវគោកថ្មី៕
